ମୁମ୍ବାଇ: ଝାଡ଼ଖଣ୍ଡ ବିଧାନସଭା ନିର୍ବାଚନରେ ଭାରତୀୟ ଜନତା ପାର୍ଟିର ହୋଇଛି ବିପୁଳ ପରାଜୟ । 2014ରେ ଦଳ ଏକାକୀ 37ଟି ଆସନ ଅକ୍ତିଆର କରିଥିବା ବେଳେ ଚଳିତ ନିର୍ବାଚନରେ 25ରେ ସନ୍ତୁଷ୍ଟ ରହିଛି । ଏନେଇ ଶିବସେନା ଭାଜପାକୁ କରିଛି କଡ଼ା ସମାଲୋଚନା ।
ଶିବସେନା ମୁଖପାତ୍ର ‘ସାମନା’ରେ ଏନେଇ ପ୍ରକାଶ ପାଇଛି ଏକ ଲେଖା । ଏଥିରେ କୁହାଯାଇଛି ଯେ, ଭାଜପା ‘କଂଗ୍ରେସ ମୁକ୍ତ ଭାରତ’ ଘୋଷଣା କରିଥିଲା । କିନ୍ତୁ ଏବେ ପରିସ୍ଥିତି ସମ୍ପୂର୍ଣ୍ଣ ବିପରୀତ । ଦେଶ ଏବେ ‘ଭାଜପା ମୁକ୍ତ’ ହେବାକୁ ଯାଉଛି । ଝାଡ଼ଖଣ୍ଡରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଗୃହମନ୍ତ୍ରୀ ଅମିତ ଶାହଙ୍କ ସମେତ ଦଳର ବହୁ ବରିଷ୍ଠ ନେତା ନିର୍ବାଚନ ପ୍ରଚାରରେ ଲାଗିଥିଲେ ମଧ୍ୟ ଭାଜପା ପରାଜିତ ହୋଇଛି ।
୨୦୧୮ ରେ ଦେଶର ୭୫ ପ୍ରତିଶତ ରାଜ୍ୟରେ ଶାସନ ଡୋରି ଭାଜପା ହାତରେ ଥିବାବେଳେ ଏବେ ଏହା ୩୦ରୁ ୩୫ ପ୍ରତିଶତ ମଧ୍ୟରେ ରହିଛି । ଶାହ ରାଜ୍ୟରେ ନିର୍ବାଚନ ପ୍ରଚାର ସମୟରେ ହିନ୍ଦୁ-ମୁସଲମାନ ମଧ୍ୟରେ ମତଭେଦ ସୃଷ୍ଟି ପାଇଁ ଉଦ୍ୟମ କରିଥିବା ଏହି ପତ୍ରିକାରେ ପ୍ରକାଶ ପାଇଛି । ଖୋଦ ବିଜେପିର ରାଜନୈତିକ ବନ୍ଧୁଥିବା ଶିବସେନା ସତ୍ତା ପାଇଁ ସମ୍ପର୍କ ତୁଟାଇଥିଲା । ପରେ କଂଗ୍ରସ ଓ ଏନସିପି ସହ ଗଠବନ୍ଧନ କରି ସରକାର ଗଢିବାରେ ସଫଳ ହୋଇଥିଲା ।
