ଲକ୍ଷ୍ନୌ: ବାଲାକୋଟରେ ହୋଇଥିବା ଏୟାର ଷ୍ଟ୍ରାଇକକୁ ନେଇ ପ୍ରମାଣ ମାଗିଲେ ଶହୀଦଙ୍କ ପରିବାର । ୟୁପି ସ୍ଥିତ ସାମଲୀର ପ୍ରଦୀପ କୁମାର ଓ ମୈନପୁରୀର ରାମ ଭାକୀଲ ପୁଲୱାମା ଆତ୍ମଘାତୀ ଆକ୍ରମଣରେ ହୋଇଥିଲେ ଶହୀଦ । ବର୍ତ୍ତମାନ ତାଙ୍କ ପରିବାର ଏୟାର ଷ୍ଟ୍ରାଇକକୁ ନେଇ ଉଠାଇଛନ୍ତି ପ୍ରଶ୍ନ । ଆତଙ୍କବାଦୀଙ୍କ ମୃତ ଶରୀରକୁ ଦେଖାଇବା ପାଇଁ ଦାବି କରିଛନ୍ତି ପରିବାର ଲୋକ ।
ରାମ ଭାକୀଲଙ୍କ ଭଉଣୀ କହିଛନ୍ତି ଯେ ମୁଁ ନିଶ୍ଚିତ, ଏୟାର ଷ୍ଟ୍ରାଇକ ହୋଇଥିଲା କିନ୍ତୁ ସେମାନେ କେଉଁଠି କରିଛନ୍ତି? ଏହାର ସ୍ପଷ୍ଟ ପ୍ରମାଣ ଦେବା ଆବଶ୍ୟକ । ପାକିସ୍ତାନ କହୁଛି ଏୟାର ଷ୍ଟ୍ରାଇକରେ ତାର କୌଣସି କ୍ଷତି ହୋଇନି । ଯେପର୍ଯ୍ୟନ୍ତ ଏହି ଏୟାର ଷ୍ଟ୍ରାଇକର ପ୍ରମାଣ ନ ମିଳିଛି ଏହାକୁ କେମିତି ବିଶ୍ବାସ କରିବି ବୋଲି ସେ ପ୍ରଶ୍ନ କରିଛନ୍ତି ।
ସେହିପରି ପ୍ରଦୀପଙ୍କ ମା ମଧ୍ୟ କହିଛନ୍ତି ଯେ ଆମେମାନେ ସନ୍ତୁଷ୍ଟ ନୁହେଁ । ବହୁ ସଂଖ୍ୟାରେ ଦେଶର ବୀର ସନ୍ତାନ ଶହୀଦ ହୋଇଛନ୍ତି । ଅନ୍ୟପଟେ ପାକିସ୍ତାନରେ ଏୟାର ଷ୍ଟ୍ରାଇକ ହୋଇଥିବା କୌଣସି ସଠିକ ଖବର ମଧ୍ୟ ନାହିଁ । ଆମେମାନେ ଏହା ଟିଭିରେ ଦେଖିବାକୁ ଚାହୁଁଛୁ । ଆମେମାନେ ଆତଙ୍କବାଦୀଙ୍କ ମୃତ ଶରୀର ଦେଖିବାକୁ ଚାହୁଁଛୁ ବୋଲି ସେ କହିଛନ୍ତି ।
ଫେବୃଆରୀ ୧୪ରେ ପୁଲୱାମା ଆତ୍ମଘାତୀ ଆକ୍ରମଣ ପରେ ଭାରତ ଓ ପାକିସ୍ତାନ ସମ୍ପର୍କରେ ତିକ୍ତତା ବଢିଯାଇଥିଲା । ଭାରତ ପାକ୍ ଉପରେ କଡା ପଦକ୍ଷେପ ନେଇ ଫେବୃଆରୀ ୨୬ରେ ବାଲାକୋଟରେ ଆତଙ୍କବାଦୀ କ୍ୟାମ୍ପ ଉପରେ ଏୟାର ଷ୍ଟ୍ରାଇକ କରିଥିଲା । ଏହି ଏୟାର ଷ୍ଟ୍ରାଇକରେ ବହୁ ସଂଖ୍ୟାରେ ଆତଙ୍କବାଦୀ ନିହତ ହୋଇଛନ୍ତି ବୋଲି ସରକାର ତରଫରୁ କୁହାଯାଇଥିଲା । ପରେ ଏୟାର ଷ୍ଟ୍ରାଇକକୁ ନେଇ ହୋଇଥିବା କ୍ଷୟକ୍ଷତିର ଆକଳନ ପାଇଁ ବିଭିନ୍ନ ଆନ୍ତର୍ଜାତିକ ଗଣମାଧ୍ୟମ ପକ୍ଷରୁ ତଦନ୍ତ ମଧ୍ୟ କରାଯାଇଛି ।
ଏହି ଏୟାର ଷ୍ଟ୍ରାଇକକୁ ନେଇ ବିରୋଧୀ ଓ ସରକାରଙ୍କ ମଧ୍ୟରେ ବାକ ଯୁଦ୍ଧ ଲାଗି ରହିଛି । ଅନ୍ୟପକ୍ଷେ ଭାରତୀୟ ବାୟୁସେନା ପକ୍ଷରୁ ଆତଙ୍କବାଦୀଙ୍କ ମୃତ୍ୟୁ ସଂଖ୍ୟାକୁ ନେଇ କୌଣସି ସୂଚନା ଜାରି କରାଯାଇ ନାହିଁ । ବର୍ତ୍ତମାନ ଶହୀଦଙ୍କ ପରିବାର ମଧ୍ୟ ଏୟାର ଷ୍ଟ୍ରାଇକର ପ୍ରମାଣ ମାଗିଛନ୍ତି ।
