ଥିରୁଅନନ୍ତପୁରମ: ଚୀନର ଉହାନ ସହରରୁ ବ୍ୟାପୁଥିବା କୋରୋନା ଭାଇରସ ଏବେ ବିଶ୍ବ ପାଇଁ ଚିନ୍ତାର ବିଷୟ ପାଲଟିଛି । ଚୀନରେ କୋରୋନା ଭାଇରସ ସଂକ୍ରମଣ ଜନିତ ମୃତ୍ୟୁସଂଖ୍ୟା ବଢି 304ରେ ପହଞ୍ଚିଛି । ଏହା ମଧ୍ୟରେ କେରଳରେ ଆଉ ଜଣେ କୋରୋନା ଭାଇରସ ରୋଗୀ ଚିହ୍ନଟ ହୋଇଥିବା ଜଣାପଡିଛି । ରବିବାର କେରଳରେ ଦ୍ବିତୀୟ କୋରୋନା ସଂକ୍ରମିତ ରୋଗୀ ଚିହ୍ନଟ ହେବା ପରେ ଚିନ୍ତା ବଢିଯାଇଛି।
ରୋଗୀ ଜଣକ ବାରମ୍ବାର ଚୀନ ଯିବା ଆସିବା କରୁଥିବା ବେଳେ ନିକଟରେ ସେ ସେଠାରୁ ଫେରିଥିଲେ । ବର୍ତ୍ତମାନ ତାଙ୍କୁ ଡାକ୍ତରଖାନାର ଆଇସୋଲେସନ ୱାର୍ଡରେ ରଖାଯାଇଛି । ତାଙ୍କର ସ୍ବାସ୍ଥ୍ୟାବସ୍ଥା ଏବେ ସ୍ଥିର ଥିବା ଜଣାପଡିଛି ।
ଏହା ପୂର୍ବରୁ ଭାରତର ପ୍ରଥମ କୋରୋନା ଆକ୍ରାନ୍ତ ରୋଗୀ ମଧ୍ୟ କେରଳରେ ଚିହ୍ନଟ ହୋଇଥିଲା । ଏଠାକାର ଜଣେ ଛାତ୍ର ଏହି ଭୂତାଣୁ ଦ୍ବାରା ଆକ୍ରାନ୍ତ ହୋଇଥିବା ଜଣାପଡ଼ିଥିଲା । ସେ ଚୀନର ଉହାନ ବିଶ୍ବବିଦ୍ୟାଳୟରେ ଅଧ୍ୟୟନ କରନ୍ତି ଏବଂ ସେ ମଧ୍ୟ ନିକଟରେ ଚୀନରୁ ଫେରିଥିଲେ ।
