ମୁମ୍ବାଇ: ମୋଦି କ୍ୟାବିନେଟରେ ଅରବିନ୍ଦ ! ଶିବସେନାର ବରିଷ୍ଠ ନେତା ଅରବିନ୍ଦ ସାୱନ୍ତଙ୍କୁ ମୋଦିଙ୍କ ମନ୍ତ୍ରିମଣ୍ଡଳରେ ସ୍ଥାନ ମିଳିବା ଏକ ପ୍ରକାର ସ୍ପଷ୍ଟ ହୋଇଛି । ଶିବସେନା ମୁଖ୍ୟ ଉଦ୍ଧବ ଠାକରେ ଅରବିନ୍ଦଙ୍କ ନାଁ ସୁପାରିଶ କରିଛନ୍ତି । ଏନେଇ ଦଳର ବରିଷ୍ଠ ନେତା ତଥା ରାଜ୍ୟସଭା ସାଂସଦ ସଞ୍ଜୟ ରାଉତ ସୂଚନା ଦେଇଛନ୍ତି ।
ସେ କହିଛନ୍ତି ଏଥର ମୋଦିଙ୍କ ମନ୍ତ୍ରିମଣ୍ଡଳରେ ଶିବସେନାରୁ ଜଣେ ନେତା ରହିବେ । ଏନେଇ ଅରବିନ୍ଦ ସାୱନ୍ତଙ୍କ ନାଁ ସୁପାରିଶ କରାଯାଇଛି । ସେ ଆଜି ମନ୍ତ୍ରୀ ଭାବରେ ଶପଥ ନେବେ । ତେବେ ଶିବସେନାକୁ କେଉଁ ବିଭାଗ ପ୍ରଧାନମନ୍ତ୍ରୀ ଦେଉଛନ୍ତି, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ।
କହିରଖୁଛୁ, ଆଜି ଦ୍ବିତୀୟଥର ପାଇଁ ପ୍ରଧାନମନ୍ତ୍ରୀ ଭାବରେ ଶପଥ ନେବେ ନରେନ୍ଦ୍ର ମୋଦି । ଏହାସହ ମୋଦିଙ୍କ ମନ୍ତ୍ରିମଣ୍ଡଳ ବି ଶପଥ ଗ୍ରହଣ କରିବେ । ସନ୍ଧ୍ୟା 7ଟାରେ ରାଷ୍ଟ୍ରପତି ଭବନରେ ଅନୁଷ୍ଠିତ ହେବ ଶପଥ ଗ୍ରହଣ ଉତ୍ସବ । ତେବେ ମୋଦିଙ୍କ ମନ୍ତ୍ରିମଣ୍ଡଳରେ କେଉଁମାନେ ସ୍ଥାନ ପାଉଛନ୍ତି, ତାହା ସ୍ପଷ୍ଟ ହୋଇନାହିଁ । ଏନଡିଏ ସହଯୋଗୀ ଦଳଗୁଡିକୁ ମଧ୍ୟ କେତେ ମନ୍ତ୍ରୀ ପଦ ମିଳୁଛି, ତା ଉପରେ ସଭିଙ୍କ ନଜର ରହିଛି ।
