ନୂଆଦିଲ୍ଲୀ: ଭୋପାଳର ବିଜେପି ସାଂସଦ ସାଧ୍ବୀ ପ୍ରଜ୍ଞା ସିଂହ ଠାକୁରଙ୍କୁ ପ୍ରତିରକ୍ଷା ମନ୍ତ୍ରାଳୟର କମିଟିରେ ବଡ ଦାୟିତ୍ବ ମିଳିଛି । ସାଧ୍ବୀ ପ୍ରଜ୍ଞାଙ୍କୁ ପ୍ରତିରକ୍ଷା ମନ୍ତ୍ରାଳୟର ସଂସଦୀୟ ପରାମର୍ଶଦାତା କମିଟିର ସଦସ୍ୟ ରୂପରେ ଚୟନ କରାଯାଇଛି । ଏହି କମିଟିର ଅଧ୍ୟକ୍ଷତା ପ୍ରତିରକ୍ଷାମନ୍ତ୍ରୀ ରାଜନାଥ ସିଂହ କରୁଛନ୍ତି ।
ପ୍ରତିରକ୍ଷା ମାମଲାର ଏହି କମିଟିରେ ସର୍ବମୋଟ 21 ଜଣ ସଦସ୍ୟ ରହିଛନ୍ତି । ସେଥିମଧ୍ୟରୁ ସାଧ୍ବୀ ପ୍ରଜ୍ଞା ଅନ୍ୟତମ । କମିଟିରେ ପ୍ରଜ୍ଞାଙ୍କ ବ୍ୟତୀୟ ଫାରୁକ ଅବ୍ଦୁଲା, ଏ ରାଜା, ସୁପ୍ରିୟା ସୁଲେ, ମିନାକ୍ଷୀ ଲେଖୀ, ରାକେଶ ସିଂହ, ଶରଦ ପାୱାର ଏବଂ ଜେପି ନଡ୍ଡା ପ୍ରମୁଖ ସଦସ୍ୟ ଶାମିଲ ଅଛନ୍ତି ।
ସେପଟେ ପ୍ରଜ୍ଞାଙ୍କ ଏହି ଦାୟିତ୍ବକୁ ବିରୋଧ କରିଛି କଂଗ୍ରେସ । ପ୍ରଜ୍ଞାଙ୍କୁ ଏହି କମିଟିରେ ସାମିଲ କରାଯିବା ଅତ୍ୟନ୍ତ ଦୁର୍ଭାଗ୍ୟପୂର୍ଣ୍ଣ ବୋଲି ଦଳ ପକ୍ଷରୁ କୁହାଯାଇଛି । କମଲନାଥ ସରକାରଙ୍କ ମନ୍ତ୍ରୀ ପିସି ଶର୍ମା କେନ୍ଦ୍ର ସରକାରଙ୍କ ଏହି ନିଷ୍ପତ୍ତିକୁ ସମାଲୋଚନା କରି କହିଛନ୍ତି, ବିଜେପିର କହିବା ଏବଂ କରିବା ମଧ୍ୟରେ ଅନେକ ତଫାତ ରହିଛି ।
