ଭୋପାଳ: ହ୍ବିଲ ଚେୟାରରେ ନାମାଙ୍କନ ପତ୍ର ଦାଖଲ କରିବାକୁ ଯାଇଥିବା ଭୋପାଳ ସାଂସଦ ପ୍ରାର୍ଥୀ ସାଧ୍ବୀ ପ୍ରଜ୍ଞାଙ୍କ ଏକ ଡାନ୍ସ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି ।
ଭିଡିଓରେ ସାଧ୍ବୀ ସହିଳାଙ୍କ ସହ ନାଚୁଥିବାର ନଜର ଆସିଛନ୍ତି । ସର୍ବଦା ତାଙ୍କୁ ହ୍ବିଲ ଚେୟାରରେ ବସିଥିବାର ଦେଖିବାକୁ ମିଳିଥାଏ । ପ୍ରଜ୍ଞା ପୂର୍ବରୁ ଅନେକ ଥର ଭାଷଣରେ ନିଜର ସ୍ବସ୍ଥ୍ୟାବସ୍ଥା ଭଲ ରହୁ ନ ଥିବାରୁ ଆଉ ବେଶି ଚଲାବୁଲା କରି ପାରୁନଥିବା କହିଛନ୍ତି ।
ପୋଲିସ ହେପାଜତରେ ଥିବା ସମୟରେ ଉତ୍ପୀଡନ ଯୋଗୁଁ ଗୋଡ ହାଡରେ ସମସ୍ୟା ଦେଖାଯାଉଥିବା ବେଳେ ପ୍ରଜ୍ଞା ଏହାର ଚିକିତ୍ସା କରାଉଥିବା କଥା କହିଛନ୍ତି । ମାତ୍ର ଭାଇରାଲ ହେଉଥିବା ଭିଡିଓରେ ପ୍ରଜ୍ଞା ମହିଳାଙ୍କ ସହ ନାଚୁଥିବା ଦେଖିବାକୁ ମିଳିଛି ।
ସାଧ୍ବୀ ପ୍ରଜ୍ଞା ମଧ୍ୟ ପ୍ରଦେଶ ରାଜଧାନୀ ଭୋପାଳର ବୈରାଗଡରେ ସିନ୍ଧି ସମାଜର ଏକ କାର୍ଯ୍ୟକ୍ରମରେ ପହଞ୍ଚିଥିଲେ । ସେଠାରେ ସେ ସମାଜର ମହିଳାଙ୍କ ସହ ନାଚିବା ସହିତ ସେଲ୍ଫି ମଧ୍ୟ ନେଇଛନ୍ତି ।
ପ୍ରଜ୍ଞାଙ୍କ ଡାନ୍ସ ଭିଡିଓ ଭାଇରାଲ ହେବାପରେ କଂଗ୍ରେସ ତାଙ୍କୁ କଟାକ୍ଷ କରିଛି । କଂଗ୍ରେସର ମିଡିଆ ସଂଯୋଜକ ନରେନ୍ଦ୍ର ସାଲୁଜା ପ୍ରଜ୍ଞାଙ୍କ ଡାନ୍ସ ଭିଡିଓକୁ ସୋସିଆଲ ମିଡିଆରେ ସେୟାର କରିବା ସହିତ ଇଶ୍ବର ତାଙ୍କୁ ସୁସ୍ଥ ରଖନ୍ତୁ ବୋଲି ଲେଖିଛନ୍ତି ।
