ଶ୍ରୀନଗର: ସାରା ଦେଶରେ ଲକଡାଉନ ଜାରି ରହିଥିବା ବେଳେ କାଶ୍ମୀରର ବିଭିନ୍ନ ସ୍ଥାନରେ ଜାରି ରହିଛି କର୍ଫ୍ୟୁ ପରିସ୍ଥିତି । ଏପରି କଟକଣା ସତ୍ତ୍ବେ ଗୁରୁବାର ହିଜବୁଲ ମୁଜାହିଦ୍ଦିନ ମୁଖ୍ୟ ରେୟାଜ ନାଇକୋ ରହୁଥିବା ପୁଲୱାମା ଜିଲ୍ଲା ଅବନ୍ତିପୋରା ଅଞ୍ଚଳରେ ଢେଲା ପଥର ମାଡ ହୋଇଥିବା ଜଣାପଡିଛି । ସୂଚନା ମୁତାବକ ବୁଧବାର ପୁଲୱାମାର ବେଗପୋରାଠାରେ ନାଇକୋ ଓ ତାହାର କିଛି ସହଯୋଗୀଙ୍କର ଏନକାଉଣ୍ଟରରେ ମୃତ୍ୟୁ ହୋଇଥିଲା । ଏହାପରେ ପରେ ସମ୍ପୃକ୍ତ ଅଞ୍ଚଳରେ ଫୋନ ଓ ଇଣ୍ଟରନେଟ ସେବା ବନ୍ଦ କରିଦିଆଯାଇଥିଲା ।
ନାଇକୋର ମୃତ୍ୟୁ ଖବର ପ୍ରଚାର ହେବା ପରେ କେବଳ ସେହି ଅଞ୍ଚଳ ନୁହେଁ ବରଂ ପୁଲୱାମାର ପ୍ରାୟ ସମସ୍ତ ଅଞ୍ଚଳ ଓ ଶ୍ରୀନଗରରେ ବର୍ତ୍ତମାନ ଏହି କଟକଣା ଜାରି ରହିଛି । ବର୍ତ୍ତମାନ କାଶ୍ମୀରରେ ତୃତୀୟ ପର୍ଯ୍ୟାୟ ଲକଡାଉନ ଜାରି ରହିଥିବା ସତ୍ତ୍ବେ ଅନେକ ସମ୍ବେଦନଶୀଳ ଅଞ୍ଚଳରେ ଅଧିକ ସୁରକ୍ଷାବଳ ମୁତୟନ କରାଯାଇଥିବା ସରକାରୀ ସୂତ୍ରରୁ ଜଣାପଡିଛି ।
ଅନ୍ୟପଟେ ନାଇକୋର ବାସସ୍ଥଳୀର ନିକଟବର୍ତ୍ତୀ ଅଞ୍ଚଳରେ କେତେକ ଯୁବଗୋଷ୍ଠୀ ଗୁରୁବାର ସକାଳୁ ପଥର ମାଡ କରୁଥିବା ଜଣାପଡିଛି । ତେବେ ପଥର ମାଡ ଘଟଣା ବୁଧବାର ମଧ୍ୟ ହୋଇଥିବା ଜଣାପଡିଛି । ଏଥିରେ 16 ଜଣ ଆହତ ହେବା ସହ 4 ଜଣ ଗୁଳିମାଡରେ ଆହତ ହୋଇଥିବା ଜଣାପଡିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
