ନୂଆଦିଲ୍ଲୀ: ୧୯୯୯ ରେ କାର୍ଗିଲ ଯୁଦ୍ଧ ଲଢି ରାଷ୍ଟ୍ରପତି ପଦକ ହାସଲ କରିଥିଲେ ଅବସରପ୍ରାପ୍ତ ସେନା ଅଧିକାରୀ ମହମ୍ମଦ ସନାଉଲ୍ଲା । ଦେଶ ପାଇଁ ନିଜ ଜୀବନକୁ ବାଜି ଲଗାଇ ଦେଇଥିଲେ ସେ । କିନ୍ତୁ ଏନଆରସି ତାଲିକା ଏବେ ତାଙ୍କୁ କରିଦେଇଛି ବିଦେଶୀ । ଆସାମରେ ଭାରତୀୟ ଏବଂ ବିଦେଶୀ ନାଗରିକଙ୍କ ପରିଚୟ ସ୍ପଷ୍ଟ କରୁଥିବା ଜାତୀୟ ନାଗରିକ ପଞ୍ଜିକା(ଏନଆରସି)ର ଚୂଡ଼ାନ୍ତ ତାଲିକାରୁ ସେ ବାଦ୍ ପଡିଛନ୍ତି । ତାଙ୍କ ସହ ତାଙ୍କ ୨ ଝିଅ ଓ ପୁଅ ମଧ୍ୟ ଏହି ତାଲିକାକୁ ବାଦ୍ ପଡିଛନ୍ତି ।
୨୦୧୮ ମେ ମାସରେ ସନାଉଲ୍ଲାଙ୍କୁ ଫରେନରସ ଟ୍ରିବ୍ୟୁନାଲ ବିଦେଶୀ ଘୋଷଣା କରିଥିଲା । ଏହାପରେ ତାଙ୍କୁ ଗିରଫ କରାଯାଇଥିଲା । ଗୌହାଟୀ ହାଇକୋର୍ଟରୁ ଜାମିନ୍ ମିଳିବା ପରେ ସେ ମୁକ୍ତ ହୋଇଥିଲେ । ତେବେ ଟ୍ରିବ୍ୟୁନାଲର ଏହି ନିଷ୍ପତ୍ତି ବିରୋଧରେ ସେ ଗୌହାଟୀ ହାଇକୋର୍ଟରେ ମାମଲା ଦାୟର କରିଥିଲେ । ଏହି ମାମଲା ଏବେ ବିଚାରାଧିନ ରହିଛି ।
ତେବେ ଅନ୍ତିମ ସମୟରେ କିଛି ପରିବର୍ତ୍ତନ ହେବ ଏବଂ ତାଙ୍କ ନାମ ଏନଆରସି ତାଲିକାରେ ସାମିଲ ହେବ ବୋଲି ଆଶା ରଖିଥିଲେ ସନାଉଲ୍ଲା । ଏଭଳି ହୋଇନଥିବାକୁ ଦୁଃଖ ପ୍ରକାଶ କରିଛନ୍ତି ସେ । କିନ୍ତୁ ହାର ମାନି ନାହାଁନ୍ତି ସନାଉଲ୍ଲା । ଗୌହାଟୀ ହାଇକୋର୍ଟ ତାଙ୍କୁ ନ୍ୟାୟ ଦେବେ ବୋଲି ସମ୍ପୂର୍ଣ୍ଣ ବିଶ୍ବାସ ରଖିଛନ୍ତି ସେ ।
ଏକ ଗଣମାଧ୍ୟମ ସାକ୍ଷାତକାରରେ ସେ କହିଛନ୍ତି, "ତାଙ୍କୁ ଏନଆରସି ସେବାକେନ୍ଦ୍ର ଦ୍ବାରା ଗତ ସପ୍ତାହରେ ଡକାଯାଇଥିଲା । ଫରେନରସ ଟ୍ରିବ୍ୟୁନାଲ ଦ୍ବାରା ବିଦେଶୀ ଘୋଷିତ ହେବାର ଦସ୍ତାବିଜ ଏବଂ ତାଙ୍କ ଜାମିନର ଦସ୍ତାବିଜ ଜମା କରିବା ପାଇଁ ତାଙ୍କୁ କୁହାଯାଇଥିଲା । ତେବେ ବର୍ତ୍ତମାନ ସେ ହାଇକୋର୍ଟଙ୍କ ନିଷ୍ପତ୍ତିକୁ ଅପେକ୍ଷା କରିବେ, ଏହା ପରେ ଯାଇ କୌଣସି ପଦକ୍ଷେପ ନେବେ ବୋଲି ସେ କହିଛନ୍ତି ।
