ମୁମ୍ବାଇ: ମହାରାଷ୍ଟ୍ର ମୁଖ୍ୟମନ୍ତ୍ରୀଙ୍କୁ ହ୍ବାଟ୍ସ ଆପ୍ରେ କାର୍ଟୁନ ସେୟାର କରିବାରୁ ପୂର୍ବତନ ନୌସେନା ଅଧିକାରୀଙ୍କୁ ଶିବସେନା କର୍ମୀ ମାଡ ମାରିଥିବା ଅଭିଯୋଗ ହୋଇଛି । ନୌସେନାର ପୂର୍ବ ଅଧିକାରୀ ମଦନ ଶର୍ମାଙ୍କୁ ମାଡ ମରାଯାଇଥିବାର ଏକ ଭିଡିଓ ମଧ୍ୟ ସାମ୍ନାକୁ ଆସିଛି । ଏହି ଘଟଣାରେ ପୋଲିସ 6 ଜଣକୁ ଗିରଫ କରିଛି । ଏହା ପୂର୍ବରୁ ସମତା ନଗର ପୋଲିସ ଶିବସେନାର 2 କାର୍ଯ୍ୟକର୍ତ୍ତାଙ୍କୁ ଗିରଫ କରିଥିଲା ।
ସେନା ଅଧିକାରୀ ମଦନଙ୍କ କହିବାନୁସାରେ, ସେ ମେସେଜ ଫରୱାର୍ଡ କରିବା ପରେ ତାଙ୍କୁ ଧମକ ପୂର୍ଣ୍ଣ ମେସେଜ ଓ ଫୋନ କଲ ଆସିଥିଲା । 8ରୁ 10 ଜଣ ବ୍ୟକ୍ତି ତାଙ୍କୁ ମାଡ ମାରିଥିଲେ । ‘ମୁଁ ନିଜର ସାରା ଜୀବନ ଦେଶ ପାଇଁ କାମ କରିଛି , ଏପରି ସରକାରଙ୍କ ଅସ୍ତିତ୍ବ ରହିବା କଥା ନୁହେଁ ।’
ଏହି ଘଟଣାଟି ଶୁକ୍ରବାର ସକାଳ 11.30 ସମୟରେ ଲୋଖଣ୍ଡୱାଲା କମ୍ପ୍ଲେକ୍ସ ଅଞ୍ଚଳର କାଣ୍ଡିଭାଲିରେ ଘଟିଥିଲା । ଏହି ମାମଲାରେ ପୋଲିସ ଆଇପିସି ଧାରା 325 ଅଧିନରେ ରୁଜୁ କରି ତଦନ୍ତ କରୁଛି ।
