ବେଜିଂ: ଇଲେକ୍ଟ୍ରୋନିକ ଡିଭାଇସ ଯେତିକି ଲୋକଙ୍କ ସମୟ ବଞ୍ଚାଇଥାଏ ସେତିକି ଶକ୍ତି ମଧ୍ୟ ନଷ୍ଟ କରିଥାଏ । ମାତ୍ରାଧିକ ସମୟ ପର୍ଯ୍ୟନ୍ତ ଏହି ଡିଭାଇସ ବ୍ୟବହାର ଦ୍ବାରା ଏହା ତାତିଯାଇଥାଏ । ସେ ଫୋନର ବ୍ୟାଟେରୀ ହେଉ କି ଟର୍ଚ୍ଚ ଲାଇଟ ପାଇଁ ବ୍ୟବହୃତ ଏଲଇଡି ଲାଇଟ ଓ କମ୍ପ୍ୟୁଟର ପ୍ରୋସେସର । ଅଧିକ ବ୍ୟବହାର ହେଲେ ଏସମସ୍ତ କମ୍ପୋନେଣ୍ଟ ଖୁବ ଶୀଘ୍ର ତାତି ଯାଉଥିବା ଦେଖାଯାଏ ।
ତେବେ ଇଲେକ୍ଟ୍ରୋନିକ ଡିଭାଇସକୁ ଥଣ୍ଡା ରଖିବା ସହ ଏହାର ତାତି ଦ୍ବାରା ଅପଚୟ ହେଉଥିବା ଶକ୍ତିରୁ ବିଦ୍ୟୁତ ଶକ୍ତି ସୃଷ୍ଟି କରିବା ପାଇଁ ଚୀନର ଉହାନ ୟୁନିଭର୍ସିଟିର କିଛି ଗବେଷକ ଖୋଜି ବାହାର କରିଛନ୍ତି ସମାଧାନ । ପୂର୍ବରୁ ଏହାର ସମାଧାନ ପାଇଁ ଅନେକ ଚେଷ୍ଟା ହୋଇଥିବା ବେଳେ କେବଳ ଗୋଟିଏ ବିଷୟ ପ୍ରତି ଧ୍ୟାନ ଦେବାରେ ସଫଳତା ମିଳିଥିଲା । ହେଲେ ଉଭୟ ବିଷୟକୁ ଗୁରୁତ୍ବ ଦେଇ ଏବେ ବାହାରିଛି ନୂଆ ସମାଧାନ । ସମ୍ପୃକ୍ତ ଗବେଷକମାନେ ଏକ ସ୍ମାର୍ଟ ଥର୍ମୋଗାଲଭାନିକ ହାଇଡ୍ରୋଜେଲ ପ୍ରସ୍ତୁତ କରିଛନ୍ତି । ଯାହା ଡିଭାଇସକୁ ଥଣ୍ଡା କରିବା ସହ ଅପଚୟ ହେଉଥିବା ଶକ୍ତିରୁ ସୃଷ୍ଟି କରିପାରେ ବିଦ୍ୟୁତ ଶକ୍ତି ।
କେତୋଟି ନିର୍ଦ୍ଦିଷ୍ଟ ଆୟନ ସହ ପାଣି ଓ ପଲିଆକ୍ରିଲାମାଇଡର ମିଶ୍ରଣରେ ପ୍ରସ୍ତୁତ ହୋଇଛି ଏହି ହାଇଡ୍ରୋଜେଲ । ଏହି ହାଇଡ୍ରୋଜେଲ ଗରମ ହେବା ମାତ୍ରେ ଇଲେକ୍ଟ୍ରୋଡ ମଧ୍ୟରେ ଫେରିସିଆନାଇଡ ଓ ଫେରୋସିଆନାଇଡ ନାମକ ଦୁଇ ଇଲେକ୍ଟ୍ରୋନ ପାସ କରିଥାଏ । ଏହାଦ୍ବାରା ବିଦ୍ୟୁତ ଶକ୍ତି ଉତ୍ପନ୍ନ ହୋଇଥାଏ । ସେପଟେ ଏହା ବ୍ୟାଟେରୀରେ ଲଗାଯିବା ପରେ ଏହା ବାୟୁମଣ୍ଡଳରୁ ଜଳ କଣିକା ଶୋଷିଥାଏ ଏବଂ ଏହା ଅପରିମିତ ସମୟ ପର୍ଯ୍ୟନ୍ତ ରିଜେନେରେଟ ହୋଇଥାଏ ।
ତେବେ ପରୀକ୍ଷାମୂଳକ ଭାବେ ଗବେଷକମାନେ ଏହାକୁ ଏକ ଫୋନ ବ୍ୟାଟେରୀରେ ଲଗାଇଥିଲେ । ଦେଖାଯାଇଥିଲା କି ଏହାଦ୍ବାରା ଫୋନ ତାପମାତ୍ରା 68 ଫାରେନହାଇଟକୁ ହ୍ରାସ ପାଇବା ସହ ଏଥିରୁ 5 ମାଇକ୍ରୋୱାଟର ଶକ୍ତି ଉତ୍ପନ୍ନ ହୋଇଥିଲା । ଅନ୍ୟପଟେ ଏହି ହାଇଡ୍ରୋଜେଲ ବ୍ୟାଟେରୀର ଫଙ୍କସନରେ କୌଣସି ପ୍ରଭାବ ପକାଇନଥାଏ ।
