ନୂଆଦିଲ୍ଲୀ: ଭାରତୀୟ ସେନାରେ ପ୍ରଥମଥର ଲାଗି ମହିଳା ଯବାନଙ୍କ ପାଇଁ ଆରମ୍ଭ ହୋଇଛି ନିଯୁକ୍ତି ପ୍ରକ୍ରିୟା । ଏହାପୂର୍ବରୁ ସେନାରେ କେବଳ ଅଧିକାରୀ ଭାବେ ନିଯୁକ୍ତି ପାଉଥିଲେ ମହିଳା । ଗୁରୁବାରରୁ ସେନା ପୋଲିସରେ ମହିଳାଙ୍କୁ ଯବାନ ଭାବେ ଭର୍ତ୍ତି କରିବା ପ୍ରକ୍ରିୟା ଆରମ୍ଭ କରାଯାଇଛି ।
ଭାରତୀୟ ସେନା କ୍ୟାଡରରେ ମହିଳାଙ୍କ ସଂଖ୍ୟା ୨୦ ପ୍ରତିଶତ କରିବାର ଲକ୍ଷ୍ୟ ରଖିଛି ସେନା । ବର୍ତ୍ତମାନ ୧୪ ଲକ୍ଷ ସଶସ୍ତ୍ର ବଳରେ ୬୫ ହଜାର ଅଧିକାରୀଙ୍କ କ୍ୟାଡରରୁ ସ୍ଥଳସେନାରେ ୧୫୦୦, ବାୟୁସେନାରେ ୧୬୦୦ ଓ ନୌସେନାରେ ୫୦୦ ହିଁ ମହିଳା ଅଛନ୍ତି ।
ମହିଳାଙ୍କ ପାଇଁ 'ଜେନେରାଲ ଡ୍ୟୁଟି'ରେ ଯବାନ ଭାବେ ଭର୍ତ୍ତି ଲାଗି ଗୁରୁବାର ଅଧିସୂଚନା ଜାରି କରାଯାଇଛି । ଏହି ସୂଚନା ଭାରତୀୟ ସ୍ଥଳସେନାର ଆଧିକାରୀକ ୱେବସାଇଟ 'joinindianarmy.nic.in' ରେ ଉପଲବ୍ଧ ରହିଛି । ଆବେଦନ ପତ୍ର ଭରିବାର ଶେଷ ତାରିଖ ହେଉଛି ଜୁନ ୮ ।
