ନୂଆଦିଲ୍ଲୀ: ରାଜ୍ୟସଭାରେ ପାରିତ ହୋଇଯାଇଛି ବହୁ ପ୍ରତିକ୍ଷୀତ ତିନି ତଲାକ୍ ବିଲ । ରାଷ୍ଟ୍ରପତିଙ୍କ ମୋହର ପରେ ଖୁବ୍ ଶୀଘ୍ର ଏହା ଆଇନ୍ରେ ପରିଣତ ହେବ । ତେବେ ଏହାକୁ ନେଇ ଏବେ ବିଭିନ୍ନ ମହଲରୁ ପ୍ରତିକ୍ରିୟା ଆସୁଛି । ପ୍ରଧାନମନ୍ତ୍ରୀ ମୋଦି ଏନେଇ ଟ୍ବିଟ କରି କହିଛନ୍ତି, ଆଜି ଭାରତ ପାଇଁ ଖୁସିର ଦିନ । ତିନି ତଲାକ ବିଲ୍ ସମାଜରେ ସମାନତା ଆଣିବ । ମୁସଲିମ ମହିଳାଙ୍କ ସହ ହେଉଥିବା ଅନ୍ୟାୟକୁ ରୋକିବ ।
ସେହିପରି କେନ୍ଦ୍ରମନ୍ତ୍ରୀ ରବିଶଙ୍କର ପ୍ରସାଦ ମୁସଲମାନ ମହିଳାଙ୍କ ପାଇଁ ଆଜି ଐତିହାସିକ ଦିନ ବୋଲି କହିଛନ୍ତି । ଉଭୟ ସଦନ ମୁଲମାନ ମହିଳାଙ୍କୁ ନ୍ୟାୟ ଦେଇଛି । ନୂଆ ଭାରତ ଗଠନ ଦିଗରେ ଏହା ମୂଳଦୁଆ ବୋଲି ସେ କହିଛନ୍ତି ।
ଭାରତୀୟ ଗଣତନ୍ତ୍ର ପାଇଁ ଆଜି ଏକ ବଡ ଦିନ ବୋଲି ଗୃହମନ୍ତ୍ରୀ ଅମିତ୍ ଶାହା କହିଛନ୍ତି । ଏଥିପାଇଁ ସେ ପ୍ରଧାନମନ୍ତ୍ରୀ ମୋଦିଙ୍କୁ ଶୁଭେଚ୍ଛା ଜଣାଇବା ସହ ଏହି ବିଲ୍କୁ ସମର୍ଥନ ଦେଇଥିବା ଦଳଙ୍କୁ ଧନ୍ୟବାଦ୍ ଦେଇଛନ୍ତି ।
ତେବେ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏହାରୁ ନେଇ ବିରୋଧୀଙ୍କୁ ସମାଲୋଚନା କରିଛନ୍ତି । ମହିଳା ଶସକ୍ତିକରଣ ଉପରେ ବଡ ବଡ କଥା କହୁଥିବା ଲୋକେ ଲୋକସଭା ଏବଂ ରାଜ୍ୟସଭାରେ ତିନି ତଲାକ୍ ବିଲ୍ (ମହିଳାଙ୍କ ସମ୍ମାନର ପ୍ରତିକ)କୁ ବିରୋଧ କରିଥିଲେ ବୋଲି ସେ କହିଛନ୍ତି ।
ସେପଟେ କଂଗ୍ରେସ ନେତା ରାଜ ବବ୍ବର ଏହାକୁ ଐତିହାସିକ ଭୁଲ ବୋଲି କହିଛନ୍ତି ।
