ନୂଆଦିଲ୍ଲୀ: କେନ୍ଦ୍ର ବୈଦୁତିକ ଓ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରୀ ରବି ଶଙ୍କର ପ୍ରସାଦ କହିଛନ୍ତି ଯେ ଖୁବ ଶୀଘ୍ର ଭାରତ ଏକ ଦୃଢ ବ୍ୟକ୍ତିଗତ ତଥ୍ୟ ସୁରକ୍ଷା ଆଇନ ପ୍ରଣୟନ କରିବ। ସେ କହିଛନ୍ତି ଯେ ଏହା କେବଳ ନାଗରିକଙ୍କ ଡାଟା ଗୋପନୀୟତା ସମ୍ବନ୍ଧୀୟ ଚିନ୍ତାଧାରାକୁ ସମାଧାନ କରିବ ନାହିଁ ବରଂ ନୂଆ ସୃଜନ ଓ ଅର୍ଥନୈତିକ ବିକାଶ ପାଇଁ ତଥ୍ୟର ଉପଲବ୍ଧତାକୁ ମଧ୍ୟ ସୁନିଶ୍ଚିତ କରିବ।
ସେ କହିଛନ୍ତି ଯେ ଏହି ଚିନ୍ତାଧାରାକୁ ଦୃଷ୍ଟିରେ ରଖି ଅନେକ ଦେଶରେ ଡିଜିଟାଲ୍ ପ୍ଲାଟଫର୍ମ ଗୁଡିକ ବିଶ୍ବସ୍ତ ଓ ନିରାପଦ ହେବା ଆବଶ୍ୟକ। ବୁଧବାର ସାଉଦି ଆରବ ଦ୍ବାରା ଆୟୋଜିତ ଜି-20 ଡିଜିଟାଲ ଅର୍ଥନୀତି ମନ୍ତ୍ରୀଙ୍କ ଭର୍ଚୁଆଲ ବୈଠକରେ ସେ ଏହା କହିଛନ୍ତି। ସେ ଜି-20ରେ ଦେଶର ମନ୍ତ୍ରୀମାନଙ୍କୁ କହିଛନ୍ତି ଯେ ବିଶ୍ବର ଯେକୌଣସି ଠାରେ ଡିଜିଟାଲ ପ୍ଲାଟଫର୍ମ ଗୁଡିକ ପ୍ରତିରକ୍ଷା, ଗୋପନୀୟତା ଓ ନାଗରିକଙ୍କ ସୁରକ୍ଷା ସମେତ ଦେଶର ସାର୍ବଭୌମିକ ଚିନ୍ତାଧାରା ପ୍ରତି ଉତ୍ତରଦାୟୀ ହେବା ଆବଶ୍ୟକ।
କେନ୍ଦ୍ର ମନ୍ତ୍ରୀ ବିଶ୍ବସ୍ତ ଆର୍ଟିଫିସିଆଲ୍ ଇଣ୍ଟେଲିଜେନ୍ସ ସିଷ୍ଟମ ଗଠନ ଉପରେ ମଧ୍ୟ ଗୁରୁତ୍ବାରୋପ କରିଛନ୍ତି ଯାହା ସମାଜକୁ ପରିବର୍ତ୍ତନ କରିପାରିବ। କୋଭିଡ-19 ପରି ବିଶ୍ବର ମହାମାରୀ ପରେ ମନ୍ତ୍ରୀ ଏକ ସ୍ଥାୟୀ ବିଶ୍ବ ଯୋଗାଣ ଶୃଙ୍ଖଳା ନିର୍ମାଣର ଆବଶ୍ୟକତା ଉପରେ ଜୋର ଦେଇଥିଲେ।
ପ୍ରଧାନମନ୍ତ୍ରୀଙ୍କ ନେତୃତ୍ବରେ ଭାରତ କୋଭିଡ-19 ସଙ୍କଟକୁ ଅନ୍ୟ ଦେଶ ତୁଳନାରେ କିପରି ଭଲ ଭାବରେ ପରିଚାଳନା କରିଛି ସେ ବିଷୟରେ ମନ୍ତ୍ରୀ ମଧ୍ୟ କହିଛନ୍ତି । କେନ୍ଦ୍ର ମନ୍ତ୍ରୀ ଭାରତର ଡିଜିଟାଲ୍ ଉଦଭାବନକୁ ଯୋଡିଛନ୍ତି । ଏହି ବୈଠକରେ ସେ ଆରୋଗ୍ୟ ସେତୁ ମୋବାଇଲ୍ ଆପ୍ ବିଷୟରେ ମଧ୍ୟ ସୂଚନା ଦେଇଥିଲେ ।
