ଜୟପୁର: ରାଜସ୍ଥାନ ରାଜନୀତି ଦିନକୁ ଦିନ ନୂଆ ମୋଡ ନେବାରେ ଲାଗିଛି । ଏପରିସ୍ଥିତିରେ ସଚିନ ପାଇଲଟଙ୍କ ପକ୍ଷରୁ ଦାଏର ଯାଚିକାର ଶୁଣାଣି କରି ରାୟ ସଂରକ୍ଷିତ ରଖିଛନ୍ତି ରାଜସ୍ଥାନ ହାଇକୋର୍ଟ । ଆସନ୍ତା ଜୁଲାଇ 24 ଯାଏଁ ପାଇଲଟ ଓ ତାଙ୍କ ସମର୍ଥକ ବିଧାୟକଙ୍କୁ ସମୟ ଦିଆଯାଇଛି । ଅର୍ଥାତ ଏହି ସମୟ ମଧ୍ୟରେ କୌଣସି ବି କାର୍ଯ୍ୟାନୁଷ୍ଠାନ ଗ୍ରହଣ ନକରିବାକୁ ବିଧାନସଭା ବାଚସ୍ପତି ସିପି ଜୋଶୀଙ୍କୁ ନିର୍ଦ୍ଦେଶ ଦେଇଛନ୍ତି ରାଜସ୍ଥାନ ହାଇକୋର୍ଟ ।
ରାଜସ୍ଥାନ ହାଇକୋର୍ଟଙ୍କ ଶୁଣାଣି ପରେ ସଚିନ ପାଇଲଟଙ୍କ ସମେତ କଂଗ୍ରେସର 18 ବିଦ୍ରୋହୀ ବିଧାୟକଙ୍କୁ ଆଶ୍ବସ୍ତି ମିଳିଛି । ତେବେ ଜୁଲାଇ 24ରେ ହାଇକୋର୍ଟଙ୍କ ସଂରକ୍ଷିତ ରାୟ ପ୍ରକାଶ ପାଇପାରେ ବୋଲି ଅନୁମାନ କରାଯାଉଛି । ବିଦ୍ରୋହୀ କଂଗ୍ରେସ ବିଧାୟଙ୍କ ଉପରେ କାର୍ଯ୍ୟାନୁଷ୍ଠାନ ନେଇ ବିଧାନସଭା ବାଚସ୍ପତିଙ୍କ ପକ୍ଷରୁ ଜାରି ନୋଟିସ ବିରୋଧରେ ହାଇକୋର୍ଟରେ ଯାଚିକା ଦାଏର କରିଥିଲେ ସଚିନ ପାଇଲଟ ।
ଅନ୍ୟପକ୍ଷେ ରାଜସ୍ଥାନ ରାଜନୀତିର ଅସ୍ଥିରତା ମଧ୍ୟରେ ହୁଏତ ମୁଖ୍ୟମନ୍ତ୍ରୀ ଅଶୋକ ଗେହଲଟ ସଂଖ୍ୟାବଳର ଦାବି କରୁଥାଇପାରନ୍ତି, ହେଲେ ଏବେ ବି ତାଙ୍କ ମୁଣ୍ଡ ଉପରେ ବିପଦର ଖଣ୍ଡା ଝୁଲୁଛି । ଗେହଲଟ ନିଜ ସରକାର ବଞ୍ଚାଇବାକୁ ସମର୍ଥ ହେବେ ନା ପାଇଲଟ ବାଜି ମାରିନେବେ ଏହାର ଚିତ୍ର ଜୁଲାଇ 24ରେ ହିଁ ସ୍ପଷ୍ଟ ହେବ । ସେପଟେ ସରକାର ଉପରେ ଥିବା ସଙ୍କଟର କଳା ବାଦଲକୁ ଏଡାଇବା ପାଇଁ ଆଗାମୀ ରଣନୀତି ଉପରେ ଆଲୋଚନା କରିବାକୁ କ୍ୟାବିନେଟ ବୈଠକ କରୁଛନ୍ତି ମୁଖ୍ୟମନ୍ତ୍ରୀ ଗେହଲଟ ।
ବ୍ୟୁରୋ ରିପୋର୍ଟ, ଇଟିଭି ଭାରତ
