ନୂଆଦିଲ୍ଲୀ: ଦେଶରେ କୋରୋନା କାୟା ଦ୍ରୁତଗତିରେ ବଢିଚାଲିଛି । ସେପଟେ କେନ୍ଦ୍ର ସରକାର ବାରମ୍ବାର ଲୋକମାନଙ୍କୁ ଆରୋଗ୍ୟ ସେତୁ ଆପ୍ ଡାଉନଲୋଡ କରିବାକୁ ଅପିଲ କରୁଛନ୍ତି । ଉଭୟ ଘରୋଇ ଏବଂ ସରକାରୀ କର୍ମଚାରୀଙ୍କ ପାଇଁ ଏହି ଆପ୍ ବ୍ୟବହାରକୁ ବାଧ୍ୟତାମୂଳକ କରାଯାଇଛି । ଇତିମଧ୍ୟରେ କଂଗ୍ରେସ ନେତା ରାହୁଲ ଗାନ୍ଧୀ ଏହି ଆପକୁ ନେଇ ପ୍ରଶ୍ନଚିହ୍ନ ସୃଷ୍ଟି କରିଛନ୍ତି ।
ସେ ଟ୍ବିଟ କରି କହିଛନ୍ତି ଯେ, ଆରୋଗ୍ୟ ସେତୁ ଆପ୍ ଏକ ଅତ୍ୟାଧୁନିକ ନିରୀକ୍ଷଣ ପ୍ରଣାଳୀ । ଯେଉଁଥିରେ କୌଣସି ଆନୁଷ୍ଠାନିକ ତଦାରଖ ବିନା ଜଣେ ପ୍ରାଇଭେଟ୍ ଅପରେଟରଙ୍କୁ ଆଉଟସୋର୍ସିଂ କରାଯାଇଛି । ଯାହା ତଥ୍ୟ ସୁରକ୍ଷା ଏବଂ ଗୋପନୀୟତାର ଚିନ୍ତା ବଢାଇଛି । ଟେକ୍ନୋଲୋଜି ଆମକୁ ସୁରକ୍ଷିତ ରଖିବାରେ ସାହାଯ୍ୟ କରିପାରିବ, କିନ୍ତୁ ନାଗରିକଙ୍କ ସହମତି ବିନା ସେମାନଙ୍କୁ ଟ୍ରାକ୍ କରିବା ପାଇଁ ଭୟର ଫାଏଦା ଉଠାଇବା ଅନୁଚିତ୍ ।
ପ୍ରକାଶ ଥାଉ କି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆରୋଗ୍ୟ ସେତୁ ଆପ କୋରୋନା ଭାଇରସ ବିରୋଧ ଲଢେଇରେ ଏକ ଗୁରୁତ୍ବପୂର୍ଣ୍ଣ ଭୂମିକା ତୁଲାଇବ ବୋଲି କହିଛନ୍ତି ।
