ନୂଆଦିଲ୍ଲୀ: ଆମେଠୀ ପରେ କେରଳରେ ବି ନିର୍ବାଚନ ଲଢିପାରନ୍ତି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ। ତାଙ୍କୁ ରାଜ୍ୟର ଗୋଟିଏ ଲୋକସଭା ଆସନରୁ ନିର୍ବାଚନ ଲଢିବାକୁ କେରଳ ପ୍ରଦେଶ କଂଗ୍ରେସ ପକ୍ଷରୁ ଅନୁରୋଧ କରାଯାଇଛି। ବାୟନାଡ ନିର୍ବାଚନ ମଣ୍ଡଳୀରୁ ରାହୁଲଙ୍କୁ ପ୍ରାର୍ଥୀ କରିବାକୁ ପ୍ରସ୍ତାବ ମଧ୍ୟ ଦିଆଯାଇଛି।
କଂଗ୍ରେସ ନେତା ଓମାନ ଚାଣ୍ଡୀଙ୍କ କହିଛନ୍ତି, ବାୟନାଡ ନିର୍ବାଚନ ମଣ୍ଡଳୀରୁ ଲୋକସଭା ନିର୍ବାଚନ ଲଢିବା ପାଇଁ ରାହୁଲଙ୍କୁ ଅନୁରୋଧ କରାଯାଇଛି। ସେ ଯେକୌଣସି ମୁହୁର୍ତ୍ତରେ ଏନେଇ ନିଷ୍ପତ୍ତି ନେଇ ପାରନ୍ତି। ତେବେ କେରଳରୁ ଲଢିବାନେଇ ବର୍ତ୍ତମାନ ସୁଦ୍ଧା ରାହୁଲ କୌଣସି ପ୍ରତିକ୍ରିୟା ଦେଇ ନାହାନ୍ତି।
ସେପଟେ କର୍ଣ୍ଣାଟକରୁ ମଧ୍ୟ ରାହୁଲଙ୍କୁ ନିର୍ବାଚନ ଲଢିବାକୁ ଦଳ ଦାବି କରୁଛି । ଗତ ଲୋକସଭା ନିର୍ବାଚନରେ କଂଗ୍ରେସ ଦକ୍ଷିଣରେ ଆଶାନୁରୂପ ପ୍ରଦର୍ଶନ କରିପାରିନଥିଲା । କିନ୍ତୁ କର୍ଣ୍ଣାଟକରେ ମେଣ୍ଟ କରି ସରକାର ଗଠନରେ ସକ୍ଷମ ହୋଇଥିଲା । ତେବେ ପୂନଃର୍ବାର ନିଜର ପୁରାତନ ଗଡରେ ରାଜୁତି କରିବାକୁ କଂଗ୍ରେସ ପ୍ରସ୍ତୁତ ହେଉଛି ।
ସେହିପରି କର୍ଣ୍ଣାଟକ ସହ କଂଗ୍ରେସର ପୁରୁଣା ସମ୍ପର୍କ ରହିଛି । 1977ରେ ରାଇବେରେଲିରୁ ଇନ୍ଦିରା ଗାନ୍ଧୀ ନିର୍ବାଚନ ହାରିଥିଲେ । ଆଉ ଏମର୍ଜେନ୍ସି ପରେ ସେତେବେଳର ଜନତା ପାର୍ଟି ସରକାର ସହ ଜୋରଦାର ଲଢେଇ ମଧ୍ୟ ଆରମ୍ଭ ହୋଇଯାଇଥିଲା । ଆଉ ଏହି ସମୟରେ ଇନ୍ଦିରାଙ୍କୁ ସାଥ ଦେଇଥିଲା କର୍ଣ୍ଣାଟକର ଚିକମଙ୍ଗଲୁର ଉପନିର୍ବାଚନ । 1978ରେ ଚିକମଙ୍ଗଲୁରରୁ ବହୁମତରେ ବିଜୟ ହେବା ସହ ପୁଣିଥିରେ କ୍ଷମତାକୁ ଫେରିଥିଲେ ।
