ମୁମ୍ବାଇ: ଆଗକୁ ଲୋକସଭା ନିର୍ବାଚନ । ସରଗରମ ହେଉଛି ରାଜନୀତି । ଆଉ ବଡ ପରଦାରେ ନଜର ଆସୁଛନ୍ତି ବରିଷ୍ଠ ରାଜନେତା । ପ୍ରଧାନମନ୍ତ୍ରୀ ମୋଦିଙ୍କ ଉପରେ ଆଧାରିତ ଚଳଚ୍ଚିତ୍ର ପିଏମ ନରେନ୍ଦ୍ର ମୋଦିର ସୁଟିଂ ଆରମ୍ଭ ହୋଇଛି । ଗୁଜୁରାଟର ବିଭିନ୍ନ ସ୍ଥାନରେ ହେବ ସୁଟିଂ। ତେବେ ଏହି ଫିଲ୍ମ ପରଦାକୁ ଆସିବା ପୂର୍ବରୁ ରାହୁଲ ଗାନ୍ଧିଙ୍କ ଫିଲ୍ମ ମାଇଁ ନେମ ଇଜ ରାଗା ଚଳଚ୍ଚିତ୍ର ପରଦାକୁ ଆସିଯିବ ।
ଏନେଇ ଚାଲିଛି ପ୍ରସ୍ତୁତି । ବର୍ତ୍ତମାନ ଏହି ଚଳଚ୍ଚିତ୍ରର ଟିଜର ପରଦାକୁ ଆସିଛି । ରୂପେଶ ପଲ ନିର୍ଦ୍ଦେଶିତ ଏହି ଫିଲ୍ମରେ ଇନ୍ଦିରା ଗାନ୍ଧୀ, ରାଜୀବ ଗାନ୍ଧୀ, ସୋନିଆ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀଙ୍କ ଭୂମିକା ମଧ୍ୟ ରହିଛି । ତେବେ ରାହୁଲଙ୍କ ପିଲାବେଳୁ ଆଜି ପର୍ଯ୍ୟନ୍ତ ସମସ୍ତ ଘଟଣାବଳୀକୁ ଏହି ସିନେମାରେ ଉପସ୍ଥାପନ କରାଯାଇଛି । ରୂପେଶଙ୍କ ଅନୁସାରେ, ରାହୁଲ ଗାନ୍ଧୀଙ୍କ ମହିମା ମଣ୍ଡନ କରିବା ନୁହେଁ । ଏଭଳି ଜଣେ ବ୍ୟକ୍ତିତ୍ବଙ୍କ ବିଷୟରେ କହିବା ଯାହାକୁ ଚାରିପଟୁ ଆକ୍ରମଣ ହେଉଛି । ହେଲେ ସେ କିଛି ଖାତିର ନକରି ସବୁ ଅସୁବିଧାର ସାମନା କରୁଛନ୍ତି । ଏହି ଫିଲ୍ମଟି ଏପ୍ରିଲ ମାସରେ ରିଲିଜ ହେବ ।
ଟିଜରଟିରେ ରାହୁଲଙ୍କ ଜୀବନର କିଛି ଝଲକ ଦେଖିବାକୁ ମିଳିଛି । ଇନ୍ଦିରା ଗାନ୍ଧୀଙ୍କ ହତ୍ୟା ଠାରୁ ଆରମ୍ଭ କରି ରାହୁଲଙ୍କ ପିତାଙ୍କ ମୃତ୍ୟୁ ପର୍ଯ୍ୟନ୍ତ ସମସ୍ତ ଦୃଶ୍ୟ ଏହି ଚଳଚ୍ଚିତ୍ରରେ ଦେଖିବାକୁ ମିଳିଛି । ରାଜନୀତିରେ ବାରମ୍ବାର ହାରିବା ପରେ ବି ରାହୁଲ କେବେ ହାରି ନାହାଁନ୍ତି । ଅତି ସୁନ୍ଦର ଭାବେ ରାହୁଲଙ୍କ ଭୂମିକା ନିଭାଇଛନ୍ତି ଅଶ୍ବିନୀ କୁମାର ।
