ଶ୍ରୀନଗର: ଭାରତୀୟ ସେନାର କଡା ଜବାବ ସତ୍ତ୍ବେ ଘାଟିରେ କମୁନାହିଁ ଆତଙ୍କବାଦୀ କାର୍ଯ୍ୟକଳାପ । ସୋମବାର ଦକ୍ଷିଣ କାଶ୍ମୀରର ଅନନ୍ତନାଗରେ ହୋଇଛି ଆତଙ୍କବାଦୀ ଆକ୍ରମଣ । ଏଥିରେ ଜମ୍ମୁ ଓ କାଶ୍ମୀର ପୋଲିସକର୍ମୀ ଶହୀଦ ହୋଇଥିବା ଜଣାପଡିଛି ।
ସୋମବାର ସଂଧ୍ୟାରେ ଅନନ୍ତନାଗ ଜିଲ୍ଲାର କେନାଲୱାନ ଅଞ୍ଚଳରେ ଆତଙ୍କବାଦୀଙ୍କ ଗୁଳିରେ ଶହୀଦ ହୋଇଛନ୍ତି ଏହି ପୋଲିସ କର୍ମୀ । ସୂଚନା ଅନୁଯାୟୀ ଇନସ୍ପେକ୍ଟର ମହମଦ ସରଫ ସଂଧ୍ୟ ପ୍ରାର୍ଥନା ସାରି ଘରକୁ ଫେରୁଥିବା ବେଳେ ଆତଙ୍କବାଦୀମାନେ ତାଙ୍କ ଉପରକୁ ଗୁଳି ଚଳାଇଥିଲେ ।
ଗୁରୁତର ଅବସ୍ଥାରେ ପୋଲିସକର୍ମୀ ଜଣଙ୍କୁ ହସ୍ପିଟାଲ ସ୍ଥାନାନ୍ତର କରାଯାଇଥିଲା । ହେଲେ ଡାକ୍ତର ଏଠାରେ ତାଙ୍କୁ ମୃତ ଘୋଷଣା କରିଛନ୍ତି । ଘଟଣା ପରେ ସମ୍ପୂର୍ଣ୍ଣ ଅଞ୍ଚଳକୁ ଭାରତୀୟ ସେନାର ଯବାନମାନେ ଘେରାଓ କରିନେଇଛନ୍ତି । ଆତଙ୍କବାଦୀମାନଙ୍କୁ ଖୋଜିବା ପାଇଁ ଜାରି ରହିଛି ସର୍ଚ୍ଚ ଅପରେସନ ।
