ଚଣ୍ଡିଗଡ: ସନ୍ଦେହ ଯୋଗୁଁ ପ୍ରେମୀଯୁଗଳଙ୍କ ମଧ୍ୟରେ ମନାନ୍ତର । ଆଉ ରାଗରେ ଜର୍ଜରିତ ହୋଇ ପ୍ରେମିକାର ହତ୍ୟା କରିଥିଲେ ପ୍ରେମିକ । ଏଭଳି କିଛି କଥା ଏକ ଘରୋଇ ଟିଭି ଚ୍ୟାନେଲରେ ହତ୍ୟା କରିଥିବା ସ୍ବୀକାର କରିଥିଲେ ଅଭିଯୁକ୍ତ । ଷ୍ଟୁଡିଓରୁ ହିଁ ପୋଲିସ ପହଞ୍ଚି ଗିରଫ କରିଛି। ଏଭଳି ଅଜବ ଘଟଣା ଘଟିଥିଲା ପଞ୍ଜାବରେ।
ଅଭିଯୁକ୍ତ ପଞ୍ଜାବର ମନୀନ୍ଦର ସିଂ ବୋଲି ଜଣାପଡିଛି । ସେ ଜଣେ ନର୍ସଙ୍କୁ ପ୍ରେମ କରୁଥିଲେ । ହେଲେ କିଛି ଦିନ ହେବ ସେ ପ୍ରେମିକାଙ୍କ ଉପରେ ସନ୍ଦେହ କରିବା ଆରମ୍ଭ କରିଥିଲେ । ଫଳରେ ଦୁହିଁଙ୍କ ଭିତରେ ଝଗଡା ଲାଗିରହୁଥିଲା । ଘଟଣା ଦିନ ଯୁବତୀଙ୍କ ରକ୍ତାକ୍ତ ମୃତଦେହ ଏକ ହୋଟେଲରୁ ମିଳିଥିଲା ।
ଆଉ ସିସିଟିଭି ଫୁଟେଜରୁ ପୋଲିସକୁ ମିଳିଥିଲା ସୁରାକ । ମନିନ୍ଦର ଓ ତାଙ୍କ ପ୍ରେମିକା 30 ଡିସେମ୍ବରରେ ସେହି ହୋଟେଲରେ ରହୁଥିବାର ସିସିଟିଭିରୁ ଜଣାପଡୁଛି । ଡିସେମ୍ବର 30 ରାତି ପ୍ରାୟ 11.55 ସମୟରେ ମନିନ୍ଦର ହୋଟେଲ ରୁମରୁ ଏକାକୀ ଯାଇଥିଲେ । ଜାନୁୟାରୀ 1 ତାରିଖ ସକାଳ ସୁଦ୍ଧା ଉଭୟଙ୍କୁ ହୋଟେଲ ଛାଡିବାର ଥିଲା । ହେଲେ ଦିନ 1ଟା ପର୍ଯ୍ୟନ୍ତ ରୁମରୁ କେହି ବାହାରକୁ ଆସିନଥିଲେ । ଫଳରେ ମାଷ୍ଟର କି ରେ କବାଟ ଖୋଲାଯାଇଥିଲା । ରକ୍ତାକ୍ତ ଅବସ୍ଥାରେ ଯୁବତୀଙ୍କ ମୃତଦେହ ପଡିଥିବା ଦେଖିବାକୁ ମିଳିଥିଲା ।
