ଇନ୍ଦୋର: ବିଜେପିର ରାଷ୍ଟ୍ରୀୟ ମହାସଚିବ କୈଳାସ ବିଜୟବର୍ଗିୟଙ୍କ ପୁଣି ଏକ ବିବାଦୀୟ ବୟାନ ସାମ୍ନାକୁ ଆସିଛି । ନିକଟରେ ଚୁଡା ଖାଇବାକୁ ନେଇ ବିବାଦୀୟ ବୟାନ ଦେଇଥିବା କୈଳାସ ଏଥର ପ୍ରଧାନମନ୍ତ୍ରୀଙ୍କ ବ୍ୟକ୍ତିଗତ ଜୀବନକୁ ନେଇ ଏକ ବଡ ବୟାନ ଦେଇଛନ୍ତି । କୈଳାସଙ୍କ ବୟାନକୁ ଯଦି ସଠିକ ବୋଲି କୁହାଯାଏ ତେବେ ଦେଶର ପ୍ରଧାନମନ୍ତ୍ରୀ ବର୍ତ୍ତମାନ ପର୍ଯ୍ୟନ୍ତ ଅବିବାହିତ ଅଛନ୍ତି । ସେ କହିଛନ୍ତି ଯେ, ପ୍ରଧାନମନ୍ତ୍ରୀଙ୍କ ଦେଶ ଭକ୍ତିର ନିଶା ଯୋଗୁଁ, ସେ ବର୍ତ୍ତମାନ ପର୍ଯ୍ୟନ୍ତ ବିବାହ କରିନାହାଁନ୍ତି ।
ନିକଟରେ ଚୁଡା ଖାଇବାକୁ ନେଇ କୈଳାସ ଏକ ବିବାଦୀୟ ବୟାନ ଦେଇଥିଲେ । ସେ କହିଥିଲେ ଯେ ଘର କାମ କରୁଥିବା ମିସ୍ତ୍ରୀ ଅଧିକ ଚୁଡା ଖାଉଥିଲେ, ଏଥିରୁ ଜଣାପଡିଲା ଯେ ମିସ୍ତ୍ରୀ ଜଣକ ବାଂଲାଦେଶୀ । କୈଳାସଙ୍କ ଏହି ବୟାନକୁ ନେଇ ଚର୍ଚ୍ଚା ଜୋର ଧରିଥିଲା । ତେବେ ବର୍ତ୍ତମାନର ବୟାନରେ କୈଳାସ କହିଛନ୍ତି ଯେ ଯୁବକଙ୍କ ପାଖରେ ଦେଶଭକ୍ତିର ନିଶା ରହିବା ଦରକାର । ଏହି ନିଶା ଦେଶର ପ୍ରଧାନମନ୍ତ୍ରୀଙ୍କୁ ଘାରିଛି । ତେବେ ପ୍ରଧାନମନ୍ତ୍ରୀ ବିବାହ କରିସାରିଥିବା ବେଳେ କୈଳାସଙ୍କ ମନ୍ତବ୍ୟ ଦଳରେ ଚିନ୍ତାକୁ ବଢାଇ ଦେଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
