ହାଇଦ୍ରାବାଦ: ମହାତ୍ମା ଗାନ୍ଧୀଙ୍କର 150 ତମ ଜୟନ୍ତୀ ଅବସରରେ ଗୁଜୁରାଟ ଗସ୍ତରେ ଯିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ମୋଦି ଗୁଜୁରାଟର ଅନେକ କାର୍ଯ୍ୟକ୍ରମରେ ଯୋଗ ଦେବେ । ପ୍ରଧାନମନ୍ତ୍ରୀ ସଂଧ୍ୟାରେ ଅହମ୍ମଦାବାଦ ବିମାନ ବନ୍ଦରରେ ପହଞ୍ଚି ସେଠାରୁ ସାବରମତୀ ଆଶ୍ରମ ଯିବେ ।
ସାବରମତୀରେ ମୋଦି ଗାନ୍ଧୀଙ୍କ ମୂର୍ତ୍ତିରେ ପୁଷ୍ପାଞ୍ଜଳି ଅର୍ପଣ କରିବା ସହ ଶ୍ରଦ୍ଧାଞ୍ଜଳି ଦେବେ । ବାପୁଙ୍କ ମାଟିରୁ ସେ ଦେଶକୁ ଖୋଲାରେ ଶୌଚ ମୁକ୍ତ ଘୋଷଣା କରିବେ । ସାବରମତୀ ରିଭର ଫ୍ରଣ୍ଟରେ ଆୟୋଜିତ ଏକ ସମାରୋହରେ 20 ହଜାର ଗ୍ରାମ ପ୍ରଧାନଙ୍କୁ ମୋଦି ସମ୍ବୋଧନ କରିବାର କାର୍ଯ୍ୟକ୍ରମ ରହିଛି । ଏହି ଗ୍ରାମ ପ୍ରଧାନଙ୍କ ମଧ୍ୟରୁ 10 ହଜାର ଗୁଜୁରାଟର ହୋଇଥିବା ବେଳେ ଅନ୍ୟ 10 ହଜାର ଦେଶର ବିଭିନ୍ନ କ୍ଷେତ୍ରରୁ ଆସିବେ ।
ଆଜିର ଦିନକୁ ଦେଶରେ ସ୍ବଚ୍ଛ ଭାରତ ଦିବସ ରୂପେ ପାଳନ କରାଯିବ । ଗାନ୍ଧୀବାଦୀ ସଂସ୍ଥା ସହ ଜଡିତ ଲୋକ, ଉଚ୍ଚ ନ୍ୟାୟାଳୟର ବିଚାରପତି, ପଦ୍ମ ପୁରସ୍କାର ବିଜେତା, ଛାତ୍ରଛତ୍ରୀ ଓ ଗ୍ରାମ୍ୟସ୍ତରର ସଫେଇ କର୍ମଚାରୀଙ୍କୁ ଏହି କାର୍ଯ୍ୟକ୍ରମକୁ ଆମନ୍ତ୍ରିତ କରାଯାଇଛି । ଦେଶର ଅନ୍ୟ କ୍ଷେତ୍ରରୁ ଆସିଥିବାକୁ ଥିବା 10 ହଜାର ଗ୍ରାମ ପ୍ରଧାନଙ୍କୁ ରାଷ୍ଟ୍ରପିତା ମହାତ୍ମା ଗାନ୍ଧୀଙ୍କ ସହ ଜଡିତ ଦାଣ୍ଡି ସ୍ମାରକସ୍ଥଳୀ ଭ୍ରମଣରେ ନିଆଯିବାର ବ୍ୟବସ୍ଥା ରହିଛି ।
ରାତି 8ଟା 30ରେ ପ୍ରଧାନମନ୍ତ୍ରୀ ଅହମ୍ମଦାବାଦର ଜିଏମଡିସି ଗ୍ରଉଣ୍ଡରେ ନବରାତ୍ରୀ କାର୍ଯ୍ୟକ୍ରମରେ ସାମିଲ ହେବେ । ଅନ୍ୟପକ୍ଷେ ବାପୁଙ୍କ 150 ତମ ଜୟନ୍ତୀ ଅବସରରେ କଂଗ୍ରେସ ବୁଧବାର ପୁରା ଦେଶରେ 'ରଘୁପତି ରାଘବ ରାଜାରାମ' ଧୁନରେ ପଦଯାତ୍ରା କରିବ । ଦିଲ୍ଲୀରେ ହେବାକୁ ଥିବା ପଦଯାତ୍ରାରେ ରାହୁଲ ଗାନ୍ଧୀ ସାମିଲ ହେବେ ।
