ନୂଆଦିଲ୍ଲୀ: ନୂଆ ଟ୍ରାଫିକ୍ ନିୟମ ପରେ ବି, ଆପଣଙ୍କୁ ରାସ୍ତାଘାଟରେ ଅନେକ ବିନା ହେଲମେଟ୍ରେ ଦେଖାଯାଉଥିବେ । ହେଲେ ଆପଣ ଜାଣିଲେ ଆଶ୍ଚର୍ଯ୍ୟ ହେବେ ଦେଶର ଏପରି ଏକ ଅଞ୍ଚଳ ଅଛି, ଯେଉଁଠି ପିଲାଠୁ ବୁଢା ସମସ୍ତେ ହେଲମେଟ୍ ପିନ୍ଧି ରାସ୍ତାରେ ଯିବା ଆସିବା କରନ୍ତି । ସକାଳ ମର୍ଣ୍ଣିଂୱାର୍କଠୁ ଆରମ୍ଭ କରି ସବୁସମୟରେ ଏଠାରେ ଲୋକେ ହେଲେମେଟ୍ ପିନ୍ଧିଥିବାର ଦେଖାଯାନ୍ତି ।
ଆଗ୍ରା ଦୟାଲବାଗ ଅଞ୍ଚଳରେ ଲୋକମାନେ ଚାଲିଚାଲି ଯାଉଥିବାଠୁ ଆରମ୍ଭ କରି କାରରେ ଯାଉଥିବା ଲୋକଙ୍କ ପର୍ଯ୍ୟନ୍ତ ସମସ୍ତେ ହେଲମେଟ ପିନ୍ଧୁଛନ୍ତି । ଏପରିକି ସାଇକେଲରେ ଯାଉଥିବା ଲୋକ ବି ହେଲେମେଟ ପିନ୍ଧିଥିବାର ଦେଖିବାକୁ ମିଳିଛି ।
ବସନ୍ତ ପଞ୍ଚମୀରେ ଏହି ଅଞ୍ଚଳରେ ଆୟୋଜିତ ହୋଇଥିବା ଏକ ବୈଠକରେ ସଚେତନତାର ପାଠ ପଢାଯିବା ପରେ ସମସ୍ତେ ଏପରି ହେଲମେଟ୍ ପିନ୍ଧୁଥିବା ଦେଖିବାକୁ ମିଳିଛି । ତେବେ ହେଲମେଟ୍ ପାଇଁ ପୋଲିସ ଓ ପ୍ରଶାସନ ଲୋକଙ୍କୁ ବୁଝାଇ ବୁଝାଇ ନୟାନ୍ତ ହେଉଥିବାବେଳେ ଏଠାକାର ଲୋକେ ସମାଜ ପାଇଁ ଉଦାହରଣ ସାଜୁଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
