ଶ୍ରୀନଗର: କାଶ୍ମୀର ଲୋକଙ୍କୁ ସ୍ବତନ୍ତ୍ର ଅଧିକାର ପ୍ରଦାନ କରୁଥିବା ସମ୍ବିଧାନର ଧାରା ୩୫(ଏ) କୁ ନେଇ ଖୋଲାଖୋଲି ଧମକ ଦେଲେ ପିଡିପି ନେତ୍ରୀ ମେହବୁବା ମୁଫ୍ତି । ୩୫(ଏ) ପ୍ରତି ଉଠୁଥିବା ପ୍ରତିଟି ହାତକୁ ଧ୍ବଂସ କରାଯିବ ବୋଲି କହିଛନ୍ତି ମେହବୁବା । ଏକ ଜନସଭାରେ ସମ୍ବୋଧିତ କରି ମେହବୁବା କହିଛନ୍ତି, 35 ଏ ସହ ଲାଗିବା ବାରୁଦକୁ ହାତକୁ ନେବା ସହ ସମାନ । ୩୫(ଏ)କୁ ହଟାଇବା କିମ୍ବା ଏଥିରେ କୌଣସି ପରିବର୍ତ୍ତନ ପାଇଁ ଉଠୁଥିବା ହାତ ସହ ପୁରା ଶରୀର ଜଳି ପାଉଁଶ ହୋଇଯିବ ବୋଲି ସେ କହିଛନ୍ତି ।
ଶନିବାର କାଶ୍ମୀରରେ ୧୦ ହଜାର ସେନାକୁ ମୁତୟନ କରିଥିଲେ କେନ୍ଦ୍ର ସରକାର । ୩୭୦ ଓ ୩୫-ଏ ହଟାଇବା ଦିଗରେ ଏହା ଏକ ପ୍ରାକ୍ ପ୍ରସ୍ତୁତି ବୋଲି କୁହାଯାଉଥିଲା । ଯାହାକୁ ମେହବୁବା ମୁଫ୍ତି ସମେତ ଓମାର ଅବ୍ଦୁଲା ବିରୋଧ କରିଥିଲେ । ଏହା ଏକ ରାଜନୈତିକ ସମସ୍ୟା ଯାହାକୁ ବଳ ପ୍ରୟୋଗ ଦ୍ବାରା ସମାଧାନ କରାଯାଇପାରିବ ନାହିଁ ବୋଲି ମେହବୁବା କହିଥିଲେ ।
ତେବେ କାଶ୍ମୀରରେ ପାକିସ୍ତାନୀ ଆତଙ୍କବାଦୀଙ୍କ ଆକ୍ରମଣର ସୂଚନା ମିଳିଥିବାରୁ ଏଭଳି କରାଯାଇଥିବା ରବିବାର କେନ୍ଦ୍ର ସରକାର ସ୍ପଷ୍ଟ କରିଛନ୍ତି ।
