ରାଞ୍ଚି: ପ୍ରେମ ନା ଦେଖେ ଜାତି, ନା ଦେଖେ ଧର୍ମ । ପ୍ରେମ ଯେକୌଣସି ବ୍ୟକ୍ତିଙ୍କ ସହ ହୋଇପାରେ । ସେ ଲିଙ୍ଗ ମଧ୍ୟ ଦେଖେନା । ସୁପ୍ରିମକୋର୍ଟରେ 377 ଧାରା ଲାଗୁ ହେବା ପରେ ସମଲିଙ୍ଗୀଙ୍କ ପ୍ରେମ କାହାଣୀ ବହୁତ ସାମନାକୁ ଆସିଛି । ହେଲେ ଏବେ କିନ୍ତୁ ରାଞ୍ଚିରୁ ଏକ ବିଚିତ୍ର ପ୍ରେମ କାହାଣୀ ଦେଖିବାକୁ ମିଳିଛି । ଝାଡଖଣ୍ଡର ଛାପରାରେ ବାସ କରୁଥିବା ଜଣେ ଯୁବକ ଶ୍ରବଣ କୁମାର ପାଟନାର ସନ୍ତୋଷ କୁମାର ନାମକ ଯୁବକଙ୍କୁ 8 ବର୍ଷ ଧରି ପ୍ରେମ କରିଆସୁଥିଲେ । ଏବେ କିନ୍ତୁ ସନ୍ତୋଷ ତାଙ୍କ ପ୍ରେମକୁ ଅସ୍ବୀକାର କରିଛନ୍ତି । ଯାହାର ନ୍ୟାୟ ମାଗିବାକୁ ରାଞ୍ଚି ହାଇକୋର୍ଟକୁ ଆସିଛନ୍ତି ଶ୍ରବଣ ।
ଶ୍ରବଣଙ୍କ କହିବା କଥା ହେଲା, ସେ ସନ୍ତୋଷଙ୍କୁ 8 ବର୍ଷ ଧରି ଭଲପାଇ ଆସୁଥିଲେ । ଉଭୟଙ୍କ ମଧ୍ୟରେ ଶାରୀରିକ ସମ୍ପର୍କ ମଧ୍ୟ ଥିଲା । ଆଉ ସମଲିଙ୍ଗୀ ଆଧରରେ ଉଭୟ ବିବାହ କରିବେ ବୋଲି ପରସ୍ପରଙ୍କୁ ପ୍ରତିଶୃତି ଦେଇଥିଲେ । ହେଲେ ସନ୍ତୋଷ ସେହି ପ୍ରତିଶୃତି ଭାଙ୍ଗିଛନ୍ତି । ସନ୍ତୋଷଙ୍କ ବିବାହ ଅନ୍ୟତ୍ର ଠିକ ହୋଇଯାଇଛି । ଯେଉଁଥିପାଇଁ ଶ୍ରବଣଙ୍କୁ ନିଜଠାରୁ ଦୂରରେ ରହିବାକୁ କହୁଥିଲେ ସନ୍ତୋଷ । ତେବେ ଶ୍ରବଣ ଏହା ମଧ୍ୟ କହିଛନ୍ତି ସନ୍ତୋଷ ତାଙ୍କ ଘର ନିକଟରେ ଘର ଭଡ଼ା କରି ଶ୍ରବଣଙ୍କୁ ରଖୁଥିଲେ । ପ୍ରତିଦିନ ସାକ୍ଷାତ ପାଇଁ ମଧ୍ୟ ଆସନ୍ତି । ହେଲେ ହଠାତ ସନ୍ତୋଷଙ୍କ ଯିବା ଆସିବା ବନ୍ଦ ହେଲା । ଶ୍ରବଣ ନିଜ ଅଧିକାର ସାବ୍ୟସ୍ତ କରିବା ପାଇଁ ସନ୍ତୋଷଙ୍କ ଘରେ ପହଞ୍ଚିଲେ । ସେଠାରେ କିନ୍ତୁ ସନ୍ତୋଷଙ୍କ ପରିବାର ଲୋକେ ହତ୍ୟା ଧମକ ଦେଇ ଶ୍ରବଣଙ୍କୁ ବିଦା କରିଦେଲେ ।
ଶ୍ରବଣ ଶେଷରେ ନ୍ୟାୟ ଦାବିରେ ରାଞ୍ଚି ହାଇକୋର୍ଟ ସମ୍ମୁଖରେ ପହଞ୍ଚିଲେ । ବୁଧବାର ସକାଳଠାରୁ ଶ୍ରବଣ ହୋଇକୋର୍ଟ ସାମନାରେ ଠିଆ ହୋଇ ନିଜର ପ୍ରେମ ପାଇଁ ନ୍ୟାୟ ମାଗୁଥିଲେ । ତେବେ ତାଙ୍କୁ ସୁରକ୍ଷାକର୍ମୀ ରାଞ୍ଚି ସିଭିଲ କୋର୍ଟକୁ ପଠାଇ ଦେଇଛନ୍ତି ।
