ଶ୍ରୀନଗର: ରାଜସ୍ଥାନ ରାଜନୀତିରେ ଏଣ୍ଟ୍ରି କରିଛନ୍ତି ଜମ୍ମୁ ଓ କାଶ୍ମୀର ପୂର୍ବତନ ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା । ପାଇଲଟ ଓ ଗେହଲଟଙ୍କ ଝଗଡାରେ ବିନା କାରଣରେ ସେ ଓ ତାଙ୍କ ବାପା ଫାରୁକ ଅବଦୁଲ୍ଲାଙ୍କୁ ଟଣା ଯାଉଥିବା ଅଭିଯୋଗ କରିଛନ୍ତି ଓମାର ।
ଓମାର ଅବଦୁଲ୍ଲା ଟ୍ବିଟ କରି କହିଛନ୍ତି ଯେ ରାଜସ୍ଥାନରେ ସଚିନ ପାଇଲଟ ଯାହା ବି କରୁଛନ୍ତି ଏଥିରେ ଫାରୁକ ଅବଦୁଲ୍ଲାଙ୍କ ହାତ ରହିଥିବା ନେଇ ଯେଉଁ ମିଥ୍ୟା ପ୍ରଚାର ହେଉଛି, ଏଥିରେ ମୁଁ ବ୍ୟତିବ୍ୟସ୍ତ ହୋଇପଡିଛି । ଏହି ଘଟଣାରେ ସେ ଛତିଶଗଡର ମୁଖ୍ୟମନ୍ତ୍ରୀ ଭୁପେଶ ବାଘେଲଙ୍କୁ ଟାର୍ଗେଟ କରିଛନ୍ତି । ତାଙ୍କ ଓକିଲ ବାଘେଲଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନେବେ ବୋଲି କହିଛନ୍ତି ଓମାର ।
ଭୁପେଶ ବାଘେଲଙ୍କ ଆରୋପ
ଛତିଶଗଡ ମୁଖ୍ୟମନ୍ତ୍ରୀ ଭୁପେଶ ବାଘେଲ ଏକ ନିର୍ଦ୍ଧିଷ୍ଟ ଗଣମାଧ୍ୟମକୁ ସାକ୍ଷାତକାର ଦେଇ କହିଥିଲେ ଯେ ରାଜସ୍ଥାନ ଘଟଣାକ୍ରମର ସଠିକଭାବେ ଅଧ୍ୟୟନ କରାଯାଉନାହିଁ, କିନ୍ତ ଆଶ୍ଚର୍ଯ୍ୟର ବିଷୟରେ ଓମାର ଅବଦୁଲାଙ୍କୁ କଣ ପାଇଁ ବନ୍ଦୀ ମୁକ୍ତ କରାଗଲା ? ବାଘେଲ କହିଛନ୍ତି, ଓମାର ଓ ମେହବୁବା ମୁଫ୍ତିଙ୍କ ଗୋଟିଏ ଧାରାରେ ବନ୍ଦୀ କରାଯାଇଥିଲା । ଏବେ ବି ମେହବୁବା ଜେଲରେ ଥିବାବେଳେ ଓମାର କିନ୍ତୁ ଖାଲାସ ହୋଇସାରିଛନ୍ତି । ସଚିନ ପାଇଲଟ ଓ ଓମାର ଅବଦୁଲାଙ୍କ ମଧ୍ୟରେ ସମ୍ପର୍କ ଥିବାରୁ ଏହା ହୋଇଥିବା କହିଥିଲେ ବାଘେଲ ।
ଓମାରଙ୍କ ଭଉଣୀଙ୍କ ସଚିନ ପାଇଲଟଙ୍କ ହୋଇଛି ବିବାହ
ରାଜସ୍ଥାନର ପୂର୍ବତନ ଉପମୁଖ୍ୟମନ୍ତ୍ରୀ ସଚିନ ପାଇଲଟଙ୍କ ବିବାହ ଓମାର ଅବଦୁଲ୍ଲାଙ୍କ ଭଉଣୀ ସାରା ଅବଦୁଲ୍ଲାଙ୍କ ସହ ହୋଇଛି । ଓମାର ନିଜ ଟ୍ବିଟକୁ ଛତିଶଗଡ ମୁଖ୍ୟମନ୍ତ୍ରୀ ଭୁପେଶ ଓ୍ବାଘେଲ, ରାହୁଲ ଗାନ୍ଧୀ ଓ କଂଗ୍ରେସ ମୁଖପାତ୍ର ରଣଦୀପ ସୁରେଜଓ୍ବାଲାଙ୍କୁ ଟ୍ୟାଗ କରି ଖୁବ ଶୀଘ୍ର ଏବାବଦରେ ନୋଟିସ ଜାରି କରିବେ ବୋଲି କହିଛନ୍ତି ।
