ଡେରାଡୁନ: ଉତ୍ତରାଖଣ୍ଡ ସରକାରଙ୍କ ଗୁରୁତ୍ବପୂର୍ଣ୍ଣ ନିଷ୍ପତ୍ତି । ସଚିବାଳୟ ଯିବାକୁ ହେଲେ ଆଧାର କାର୍ଡ ଜରୁରୀ । ବିନା ଆଧାର କାର୍ଡରେ ସଚିବାଳୟ ପ୍ରବେଶକୁ ସରକାର ନିଷେଧ କରିଛନ୍ତି । ମୁଖ୍ୟମନ୍ତ୍ରୀ ତ୍ରୀବେନ୍ଦ୍ର ସିଂ ରାୱତ ଏନେଇ ଗୁରୁବାର ସୂଚନା ଦେଇଛନ୍ତି ।
ମୁଖ୍ୟମନ୍ତ୍ରୀ କହିଛନ୍ତି, ସୁରକ୍ଷାକୁ ଦୃଷ୍ଟିରେ ରଖି ସରକାର ଏହି ନିଷ୍ପତ୍ତି ନେଇଛନ୍ତି । ଏହି ନିଷ୍ପତ୍ତି ଗୁଇନ୍ଦା ରିପୋର୍ଟକୁ ଆଧାର କରି ନିଆଯାଇଛି । ସେହିପରି ରେଳ ଷ୍ଟେସନ, ସରକାରୀ କାର୍ଯ୍ୟାଳୟ ଏବଂ ପର୍ଯ୍ୟଟନ ସ୍ଥଳରେ ମଧ୍ୟ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି । ନିୟମ ମାନିବା ପାଇଁ ରାଜ୍ୟବାସୀଙ୍କୁ ନିବେଦନ କରିଛନ୍ତି ମୁଖ୍ୟମନ୍ତ୍ରୀ ତ୍ରିବେନ୍ଦ୍ର ସିଂ ରାୱତ ।
ତେବେ ଯେଉଁମାନେ ସଚିବାଳୟର କର୍ମଚାରୀ, ସେମାନଙ୍କ ପାଇଁ ଆଧାର କାର୍ଡ ପ୍ରତିଦିନ ଆଣିବାରେ ସମସ୍ୟା ହୋଇପାରେ । ତେଣୁ ସେମାନଙ୍କ କ୍ଷେତ୍ରରେ ଏହାକୁ କୋହଳ କରାଯିବା ନେଇ ପରବର୍ତ୍ତୀ ସମୟରେ ନିଷ୍ପତ୍ତି ନିଆଯିବ ବୋଲି କହିଛନ୍ତି ସଚିବାଳୟ ସଙ୍ଘର ସଭାପତି ଦୀପକ ଯୋଶୀ ।
