ନୂଆଦିଲ୍ଲୀ: ନିର୍ଭୟା କାଣ୍ଡର ଦୀର୍ଘ ସାତ ବର୍ଷ ପରେ ଫାଶୀରେ ଝୁଲିବେ ଦୋଷୀ । ଏଥିପାଇଁ ପ୍ରସ୍ତୁତି ଚାଲିଛି । ପ୍ରଥମେ 100 କିଲୋ ଓଜନ ବିଶିଷ୍ଟ ଡମିର ପରୀକ୍ଷଣ କରାଯିବା ସହ ବକ୍ସରରୁ 10ଟି ରଶି ମଧ୍ୟ ଅଣାଯିବାକୁ କୁହାଯାଇଛି । ଏଥିପାଇଁ ଦୋଷୀ ପୱନକୁ ମଣ୍ଡୋଲି ଜେଲରୁ ତିହାର ଜେଲକୁ ସ୍ଥାନାନ୍ତର କରାଯାଇଛି ।
ସୂଚନା ଅନୁସାରେ, ଯଦିଓ ସେମାନଙ୍କୁ ଫାଶୀ ଦଣ୍ଡରେ ଦଣ୍ଡିତ କରାଯିବା ନେଇ ସ୍ପଷ୍ଟ ହୋଇନାହିଁ କିନ୍ତୁ ପ୍ରସ୍ତୁତି ଜୋରସୋରରେ ଚାଲିଛି । ସେଥିପାଇଁ ଜେଲ କର୍ତ୍ତୃପକ୍ଷ ନିଜ ନିଜ ପ୍ରସ୍ତୁତିରେ ଲାଗିପଡିଛନ୍ତି ।100 କେଜିର ଡମିକୁ ଏକ ଘଣ୍ଟା ଯାଏଁ ଝୁଲାଇ ରଖିବାର ପରୀକ୍ଷଣ ମଧ୍ୟ କରାଯାଉଛି । ଯେପରି ଫାଶୀ ଦେବା ସମୟରେ କୌଣସି ଅସୁବିଧା ନ ଉପୁଜେ ।
ନିର୍ଭୟା କାଣ୍ଡର ଦୋଷୀ ପୱନ, ମଣ୍ଡୋଲି ଜେଲରୁ ତିହାର ଜେଲକୁ ସ୍ଥାନାନ୍ତର ହୋଇଛି । ସୂଚନା ମୁତାବକ, ସାଧାରଣତଃ ତିହାର ଜେଲର 3 ନମ୍ବର କୋଠରୀ ଫାଶୀ ଦେବାର ବ୍ୟବସ୍ଥା ରହିଛି । ଏବେ ଦୋଷୀ ପୱନ, ଅକ୍ଷୟ ଓ ମୁକେଶଙ୍କୁ ତିହାର ଜେଲର 2 ନମ୍ବର କୋଠରୀରେ ରଖାଯାଇଛି । ସେପଟେ ଦୋଷୀ ବିନୟକୁ 4 ନମ୍ବର ସେଲରେ ରଖାଯାଇଛି ।
ଫାଶୀ ଦେବା ସମୟରେ ସମସ୍ତ ଦୋଷୀଙ୍କୁ 3 ନମ୍ବର ସେଲକୁ ସ୍ଥାନାନ୍ତର କରାଯିବ ବୋଲି ଜେଲ କର୍ତ୍ତୃପକ୍ଷ ସୂଚନା ଦେଇଛନ୍ତି । ସେପଟେ ନିର୍ଭୟା ଦୋଷୀଙ୍କୁ ଫାଶୀ ହେବା ନେଇ ଚର୍ଚ୍ଚା ଜୋରଦାରରେ ଚାଲିଛି । ଯାହା ଫଳରେ ଦୋଷୀଙ୍କ ମଧ୍ୟରେ ଭୟର ବାତାବରଣ ଦେଖାଦେଇଛି ।
