ପାଟନା: ବିହାର ବିଧାନସଭା ନିର୍ବାଚନର ଦ୍ବିତୀୟ ପର୍ଯ୍ୟାୟ ଭୋଟିଂ ଆରମ୍ଭ ହୋଇଛି । ସକାଳ 7ଟାରୁ ମତଦାନ ଆରମ୍ଭ ହୋଇଛି । ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିହାର ବାସୀଙ୍କୁ ଅଧିକ ସଂଖ୍ୟାରେ ମତଦାନ କେନ୍ଦ୍ରକୁ ଆସି ଭୋଟ ଦେବାକୁ ଅପିଲ କରିଛନ୍ତି । ଗଣତନ୍ତ୍ରର ସବୁଠାରୁ ବଡ ପର୍ବରେ ସାମିଲ ହୋଇ ଏହାକୁ ସଫଳ କରିବାକୁ ସେ ଟ୍ବିଟ କରି କହିଛନ୍ତି । ଭୋଟିଂ ସମୟରେ ସାମାଜିକ ଦୂରତା ପାଳନ କରିବାକୁ ମଧ୍ୟ ନିବେଦନ କରିଛନ୍ତି ।
ସେହିପରି ଦେଶର ବିଭିନ୍ନ ସ୍ଥାନରେ ଆଜି ଉପନିର୍ବାଚନ ଆରମ୍ଭ ହୋଇଯାଇଛି । ସମସ୍ତ ଦେଶବାସୀଙ୍କୁ ଗଣତନ୍ତ୍ରର ଏହି ପର୍ବରେ ସାମିଲ ହେବାକୁ ନିଜର ମତଦାନ ଦେବାକୁ ପିଏମ ଅପିଲ କରିଛନ୍ତି ।
ଆଜି ବିହାର ବିଧାନସଭା ନିର୍ବାଚନର ଦ୍ବିତୀୟ ପର୍ଯ୍ୟାୟ ଭୋଟିଂ ଆରମ୍ଭ ହୋଇଯାଇଛି । 17 ଟି ଜିଲ୍ଲାର 94 ଟି ଆସନ ପାଇଁ ମତଦାନ ଦେଉଛନ୍ତି ଭୋଟର । ଏହି ପର୍ଯ୍ୟାୟରେ 1 ହଜାର 463 ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ ବିହାର ବାସୀ । ଏହି ନିର୍ବାଚନରେ ମହାମେଣ୍ଟର ମୁଖ୍ୟମନ୍ତ୍ରୀ ପ୍ରାର୍ଥୀ ତଥା ଆରଜେଡି ନେତା ତେଜସ୍ବୀ ଯାଦବଙ୍କ ଭାଗ୍ୟ ପରୀକ୍ଷା ହେବ ।
ସୂଚନାଯୋଗ୍ୟ, ବିହାର ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟ ମତଦାନ ଅକ୍ଟୋବର 28 ରେ ଶେଷ ହୋଇଛି । ନଭେମ୍ବର 3 ତାରିଖରେ ଦ୍ବିତୀୟ ପର୍ଯ୍ୟାୟ ଲାଗି ଜାରି ରହିଛି ମତଦାନ। ତୃତୀୟ ପର୍ଯ୍ୟାୟ ନଭେମ୍ବର 7ରେ ଭୋଟିଂ କରାଯିବ । ଭୋଟିଂର ଫଳାଫଳ ନଭେମ୍ବର 10 ରେ ଆସିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
