ଆଗ୍ରା: ମୋଗଲ ଭାସ୍କର୍ଯ୍ୟର ଅପୂର୍ବ ନିଦର୍ଶନ, ପ୍ରେମର ପ୍ରତୀକ ଓ ଭାରତର ପରିଚୟ ବହନ କରୁଥିବା ତାଜମହଲ ପରିଦର୍ଶନ କରିବାକୁ ଯାଉଛନ୍ତି 4ଦିନିଆ ଭାରତ ଗସ୍ତରେ ଆସିଥିବା ମିଆଁମାର ରାଷ୍ଟ୍ରପତି । ଶନିବାର ରାଷ୍ଟ୍ରପତି ୟୁ ୱିନ ମିଣ୍ଟ ଓ ତାଙ୍କ ଧର୍ମପତ୍ନୀ ତଥା ମିଆଁମାରର ପ୍ରଥମ ମହିଳା ଡାଓ ଚୋ ଚୋ ତାଜମହଲ ପରିଦର୍ଶନ କରିବେ ।
ଗୋଟିଏ ସପ୍ତାହ ଭିତରେ ଦ୍ବୀତୟ ଥର ପାଇଁ ଭିଭିଆଇପିଙ୍କ ପରିଦର୍ଶନ ନେଇ ତାଜମହଲଙ୍କୁ ସାଧରାଣ ପର୍ଯ୍ୟଟକଙ୍କ ପାଇଁ ବନ୍ଦ ରଖାଯିବ । ଶନିବାର ମିଆଁମାର ରାଷ୍ଟ୍ରପତି ୟୁ ୱିନ ମିଣ୍ଟଙ୍କ ପରିଦର୍ଶନ ପାଇଁ ତାଜମହଲକୁ ଦୁଇ ଘଣ୍ଟା ପାଇଁ ବନ୍ଦ ରଖାଯିବ । ଭାରତୀୟ ପ୍ରତ୍ନତାତ୍ତ୍ବିକ ସର୍ବେକ୍ଷଣ ବିଭାଗ ପକ୍ଷରୁ ତାଜମହଲ ବନ୍ଦ ରଖିବା ପାଇଁ ନିର୍ଦ୍ଦେଶ ଦିଆଯାଇଛି । ଫଳରେ ଶନିବାର ମଧ୍ୟାହ୍ନ 12ଟାରୁ ଅପରାହ୍ନ 2ଟା ଯାଏଁ ତାଜମହଲ ସାଧାରଣ ନାଗରିକଙ୍କ ପାଇଁ ବନ୍ଦ ରହିବ ।
।
ସପ୍ତାହର ଆରମ୍ଭରେ ସୋମବାର ଦିନ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ, ସପରିବାର ତାଜମହଲ ବୁଲି ଦେଖିଥିଲେ । ଏହାସହ ମୋଗଲ-ଭାରତୀୟ ଭାସ୍କର୍ଯ୍ୟର ଅପୂର୍ବ ନିଦର୍ଶନ ତାଜମହଲ ପରିଦର୍ଶନ କରି ବିମୋହିତ ହୋଇଥିବା ଟ୍ବିଟ କରି କହିଥିଲେ ।
ଏଠାରେ ସୂଚନା ଯୋଗ୍ୟ ଯେ, ବୁଧବାର ମିଆଁମାର ରାଷ୍ଟ୍ରପତି ୟୁ ୱିନ ମିଣ୍ଟ ଚାରି ଦିବସୀୟ ଭାରତ ଗସ୍ତରେ ଆସି ନୂଆଦିଲ୍ଲୀରେ ପହଞ୍ଚିଥିଲେ । ସେ ଫେବୃଆରୀ 26ରୁ 29 ଯାଏଁ ଭାରତ ଗସ୍ତରେ ରହିଛନ୍ତି ।
