ବର୍ମା: କୋରୋନା କାଳରେ ଉତ୍ତର-ପୂର୍ବ ଭାରତର ଉଗ୍ରବାଦୀ ସଂଗଠନ ବିରୋଧରେ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କ ରଣନୀତି ଫଳପ୍ରଦ ହୋଇଛି । ନିକଟରେ ମିଆଁମାର କିଛି ଅଞ୍ଚଳରେ ସକ୍ରିୟ ଥିବା 22 ଜଣ ମୋଷ୍ଟ ୱାଣ୍ଟେଡ ଉଗ୍ରବାଦୀଙ୍କୁ ଭାରତକୁ ହସ୍ତାନ୍ତର କରିଛି । ଏହି ଉଗ୍ରବାଦୀମାନେ ମିଆଁମାର ସେନା ଦ୍ବାରା ଏନକାଉଣ୍ଟର ସମୟରେ କାବୁ ହୋଇଥିଲେ ।
ଏହି 22 ଜଣ ଉଗ୍ରବାଦୀଙ୍କୁ ସ୍ବତନ୍ତ୍ର ବିମାନ ଯୋଗେ ଭାରତ ଅଣାଯାଇଛି । ଏହି ଉଗ୍ରବାଦୀମାନଙ୍କୁ ମଣିପୁର ଏବଂ ଆସାମ ପୋଲିସକୁ ହସ୍ତାନ୍ତର କରାଯିବ । ଯେଉଁଠାରେ ସେମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଜଣେ ଅଧିକାରୀଙ୍କ ମୁତାବକ ଏହି ଘଟଣା ଦର୍ଶାଉଛି ଯେ ଭାରତ ଏବଂ ମିଆଁମାର ମଧ୍ୟରେ ସମ୍ପର୍କ ସୁଦୃଢ ହେଉଛି ।
ଜାତୀୟ ସୁରକ୍ଷା ପରାମର୍ଶଦାତା ଅଜିଦ ଡୋଭାଲଙ୍କ ଏହି ଅପରେସନରେ ଜଡିତ ଜଣେ ଅଧିକାରୀ କହିଛନ୍ତି ଯେ ସ୍ବତନ୍ତ୍ର ବିମାନରୁ ଭାରତକୁ ଆସୁଥିବା ଏହି କିଛି ଉଗ୍ରବାଦୀଙ୍କୁ ପ୍ରଥମେ ମଣିପୁରର ରାଜଧାନୀ ଇମ୍ଫାଲରେ ଅବତରଣ କରାଯିବ । ଅବଶିଷ୍ଟ ଉଗ୍ରବାଦୀଙ୍କୁ ଗୌହାଟୀରେ ସ୍ଥାନୀୟ ପୋଲିସକୁ ହସ୍ତାନ୍ତର କରାଯିବ । ସେ କହିଛନ୍ତି ଯେ ଉତ୍ତର-ପୂର୍ବ ବିଦ୍ରୋହୀ ସଂଗଠନର ଏହି ମୋଷ୍ଟୱାଣ୍ଟେଡ ଉଗ୍ରବାଦୀଙ୍କୁ ହସ୍ତାନ୍ତର କରିବା ପାଇଁ ଭାରତ ସରକାରଙ୍କ ଅନୁରୋଧ ପରେ ମିଆଁମାର ସରକାର ଏହା ପ୍ରଥମ ପଦକ୍ଷେପ ।
ମିଆଁମାରରୁ ଭାରତକୁ ହସ୍ତାନ୍ତର କରାଯିବାକୁ ଥିବା ଏହି ଉଗ୍ରବାଦୀ ମଧ୍ୟରେ ଏନଡିଏଫବି (ଏସ) ର କଥିତ ଗୃହ ସଚିବ ରାଜେନ ଡାଇମରି, ୟୁଏନଏଲଏଫର କ୍ୟାପଟେନ ସନତୋମ୍ବା ନିଙ୍ଗଥୈଜମ ଏବଂ ଅନ୍ୟ ଏକ ଉଗ୍ରବାଦୀ ସଂଗଠନର କମାଣ୍ଡର ପର୍ଶୁରାମ ଲେସରାମ ଅଛନ୍ତି । ଏହି 22 ବିଦ୍ରୋହୀଙ୍କ ମଧ୍ୟରୁ 4 ଜଣ ମଣିପୁରର ଚାରୋଟି ବିଦ୍ରୋହୀ ଗୋଷ୍ଠୀର ସଦସ୍ୟ ହୋଇଥିବାବେଳେ ଅବଶିଷ୍ଟ 10 ଜଣ ଆସାମର ବିଦ୍ରୋହୀ ଗୋଷ୍ଠୀର ସକ୍ରିୟ ସଦସ୍ୟ ଅଟନ୍ତି ।
