ଭୋପାଳ: 'ଲଭ ଜିହାଦ' ବିରୋଧରେ ହେବାକୁ ଥିବା ଆଇନ ଉପରେ ବଡ ବୟାନ ଦେଇଛନ୍ତି ମଧ୍ୟପ୍ରଦେଶର ଗୃହମନ୍ତ୍ରୀ ନରୋତ୍ତମ ମିଶ୍ର । ସରକାର ଅଭିଯୁକ୍ତଙ୍କ ସମ୍ପତି ବ୍ୟାଜାପ୍ତ କରିବା ପ୍ରାବଧାନ ଆଣିବାକୁ ବିଚାର କରାଯାଉଥିବା ସେ କହିଛନ୍ତି ।
ରବିବାର ଭୋପାଳ ଗସ୍ତରେ ଥିବା ସମୟରେ ଗୃହମନ୍ତ୍ରୀ ଗଣମାଧ୍ୟମଙ୍କ ସହ ଆଲୋଚନା କରୁଥିବା ସମୟରେ ସେ କହିଛନ୍ତି ଯେ, ମଧ୍ୟପ୍ରଦେଶରେ ଲଭ ଜିହାଦ ବିରୋଧରେ ଆଣାଯାଉଥିବା ଆଇନକୁ ଆହୁରି କଠୋର କରିବାକୁ ବିଚାର କରାଯାଉଛି । ଖୁବଶୀଘ୍ର ଲଭ ଜିହାଦ ଆଇନ କ୍ୟାବିନେଟରେ ଆଣାଯିବ । ଏହାପରେ 28 ଡିସେମ୍ବରରେ ହେବାକୁ ଥିବା ବିଧାନସଭା ଅଧିବେଶନରେ ଏହାକୁ ଉପସ୍ଥାପନ କରାଯିବ ।
ସେ ଆହୁରି ମଧ୍ୟ କହିଛନ୍ତି ଯେ, ଆମର ଆଇନ ଅନ୍ୟ ପ୍ରଦେଶଙ୍କ ଠାରୁ ଭିନ୍ନ ହେବା ସହ କଠୋର ଆଉ ଭଲ ହେବ । 10 ବର୍ଷ ଦଣ୍ଡାଦେଶ ଆଇନ ଉପରେ ପୂର୍ବରୁ ହିଁ ଘୋଷଣା କରାଯାଇଥିଲା । ଏବେ ଏଥିରେ ଦୋଷୀଙ୍କ ସମ୍ପତି ବାର୍ଯ୍ୟାପ୍ତ କରିବା ସହ ପୀଡିତାଙ୍କୁ କ୍ଷତିପୂରଣ ଦେବା ଉପରେ ଆଲୋଚନା ଚାଲିଛି ।
ସୂଚନାଯୋଗ୍ୟ ଉତ୍ତରପ୍ରଦେଶ ପରେ ମଧ୍ୟପ୍ରଦେଶରେ ମଧ୍ୟ ଖୁବଶୀଘ୍ର ଲଭ ଜିହାଦ ବିରୋଧରେ ଆଇନ ଆଣିବାକୁ ଯାଉଛନ୍ତି । ଏହି ଆଇନକୁ ନେଇ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ ଏବଂ ଗୃହମନ୍ତ୍ରୀ ନରୋତ୍ତମ ମିଶ୍ର ସମେତ ଗୃହ ଏବଂ ବିଧି ବିଭାଗର ଅଧିକାରୀଙ୍କ ସହ ବୈଠକ ମଧ୍ୟ ହୋଇ ସାରିଛି ।
