ଭୋପାଳ: ମଧ୍ୟପ୍ରଦେଶ ଉପନିର୍ବାଚନରେ ଶିବସେନାକୁ ଝଟକା । ଶିବସେନା ଟିକେଟରେ ପ୍ରାର୍ଥିପତ୍ର ଦାଖଲ କରିବାର 3 ଦିନ ପରେ ପୁଣି ବିଜେପିକୁ ଫେରିଛନ୍ତି ଜଗମୋହନ ବର୍ମା । କିଛିଦିନ ତଳେ ବିଜେପି ଛାଡି ଶିବସେନାରେ ଯୋଗ ଦେଇଥିଲେ ଜଗମୋହନ ।
ଜଗମୋହନ ବିଜେପି ଛାଡି ଶିବସେନାରେ ମିଶିବା ପରେ ଦଳ ତାଙ୍କୁ ସନୱାରରୁ ପ୍ରାର୍ଥୀ କରିଥିଲା । ଏପରିକି ସେ ପ୍ରାର୍ଥିପତ୍ର ମଧ୍ୟ ଦାଖଲ କରିଥିଲେ । ହେଲେ ଗେରୁଆ ଟିମ୍ ତାଙ୍କୁ ମନାଇବାରେ ସଫଳ ହୋଇଛନ୍ତି । ସେ ଆଜି(ସୋମବାର) ପୁଣି ଦଳକୁ ଫେରୁଥିବା ଜଣାପଡିଛି ।
ସେ ବିଜେପି ଉପରେ ଅସନ୍ତୁଷ୍ଟ ହୋଇ ଦଳ ଛାଡିବା ସହ ବିଜେପି ପ୍ରାର୍ଥୀ ତୁଳସୀ ସିଲଭାତଙ୍କ ବିରୋଧରେ ପ୍ରାର୍ଥୀ ହୋଇଥିଲେ । ତେବେ ବିଜେପି ବିଧାୟକ ରମେଶ ମେଣ୍ଡୋଲା ଓ ଆକାଶ ବିଜୟବର୍ଗୀୟ, ଜଗମୋହନଙ୍କୁ ମନାଇବାରେ ସଫଳ ହୋଇଛନ୍ତି । ସେ ଆଜି ଦଳରେ ପୁଣି ଥରେ ସାମିଲ ହେବେ ବୋଲି ରାଜି ହୋଇଛନ୍ତି ।
ଏନେଇ ଗଣମାଧ୍ୟମକୁ ସୂଚନା ଦେଇ ଜଗମୋହନ କହିଛନ୍ତି,‘‘ବିଜେପି ମୋ ମା’ ପରି’’ । ଏହାସହ ମୁଁ ମୋ ଦଳର ସଦସ୍ୟତା ପୁଣି ଥରେ ଗ୍ରହଣ କରିଛି ଓ ନାମାଙ୍କନ ପ୍ରତ୍ୟାହାର କରିନେବି ବୋଲି ସେ କହିଛନ୍ତି । କିଛି ଶ୍ରମିକ ସଂଘକୁ ବ୍ୟାନ କରିବା ପ୍ରତିବାଦରେ ସେ ବିଜେପି ଛାଡିଥିଲେ ।
ସୂଚନାଥାଉକି, ରାଜ୍ୟରେ 28ଟି ଆସନ ପାଇଁ ଉପନିର୍ବାଚନ ହେଉଛି । ନଭେମ୍ବର 3 ତାରିଖରେ ଭୋଟ ଗ୍ରହଣ ଥିବାବେଳେ 10 ତାରିଖରେ ଗଣତି ରହିଛି ।
