ଗୌହାଟୀ: ସୋମବାର ଲୋକସଭାରେ ପାରିତ ହୋଇଯାଇଛି ବହୁ ଚର୍ଚ୍ଚିତ ନାଗରିକତା ସଂଶୋଧନ ବିଲ (ସିଏବି) ବିଲ । ବୁଧବାର ରାଜ୍ୟସଭାରେ କେନ୍ଦ୍ର ଗୃହମନ୍ତ୍ରୀ ବିଲକୁ ଆଗତ କରିବା ପରେ ଜାରି ରହିଛି ଜୋରଦାର ବିତର୍କ । ଯେହେତୁ ରାଜ୍ୟସଭାରେ ସରକାରଙ୍କ ସଂଖ୍ୟା ଗରିଷ୍ଠତା ନାହିଁ ସେହି ଦୃଷ୍ଟିରୁ ବିରୋଧୀ ବିଲକୁ ଅଟକାଇବା ପାଇଁ ସବୁ ଶକ୍ତି ଲଗାଇ ଦେଇଛନ୍ତି ।
ଅନ୍ୟପଟେ ସଡକରୁ ସଂସଦ ପର୍ଯ୍ୟନ୍ତ ବିଲ ବିରୋଧରେ ଜାରି ରହିଛି ପ୍ରତିବାଦ ଓ ବିକ୍ଷୋଭ । ବିଶେଷ କରି ଉତ୍ତର ପୂର୍ବାଞ୍ଚଳ ରାଜ୍ୟରେ ବିଲ ବିରୋଧରେ ତୀବ୍ର ଜନ ଅସନ୍ତୋଷ ବୃଦ୍ଧି ପାଉଛି । ଜନସାଧାରଣ ରାଜରାସ୍ତାକୁ ଓହ୍ଲାଇଆସି ଜଳା ପୋଡା କରିବା ସହ ସରକାରୀ ସମ୍ପତ୍ତି ନଷ୍ଟ କରୁଛନ୍ତି । ସ୍ଥିତି ଧୀରେ ଧୀରେ ନିୟନ୍ତ୍ରଣ ବାହାରକୁ ଯାଉଥିବା ଦେଖି ସରକାର ପ୍ରତିଷେଧ ମୂଳକ ବ୍ୟବସ୍ଥା ଗ୍ରହଣ କରିବାକୁ ଯାଇ ଆସମାରେ ବହୁ କଟକଣା ଲଗାଇଛନ୍ତି ।
ଆସାମର ଲକ୍ଷ୍ମୀପୁର, ତିନସୁକିଆ, ଢେମାଜୀ, ଦୀବ୍ରୁଗଡ, ଚରାଇଦେଓ, ଶିବ ସାଗର, ଯୋରହାଟ, ଗୋଲାଘାଟ କାମରୁପ ଜିଲ୍ଲାରେ 24 ଘଣ୍ଟା ପାଇଁ ମୋବାଇଲ ଫୋନ ଓ ଇଣ୍ଟରନେଟ ସେବା ବନ୍ଦ ରଖିବାକୁ ନିର୍ଦ୍ଦେଶ ଜାରି ହୋଇଛି । ଏହି କଟକଣା ବୁଧବାର ସଂଧ୍ୟା 7ଟାରୁ ଗୁରୁବାର ସଂଧ୍ୟା 7ଟା ପର୍ଯ୍ୟନ୍ତ ବଳବତ୍ତର ରହିବ ।
ଅନ୍ୟପଟେ ଆସାମର କିଛି ଅଞ୍ଚଳରେ 12ଟି ଟ୍ରେନକୁ ସମ୍ପୂର୍ଣ୍ଣ ବାତିଲ ହୋଇଥିବା ବେଳେ 10ଟି ଟ୍ରେନର ଗତିପଥକୁ ପରିବର୍ତ୍ତନ କରାଯାଇ ସାମାନ୍ୟ ବାତିଲ କରାଯାଇଛି । ଏହାସହ ଏକ ଗୁରୁତ୍ବପୂର୍ଣ୍ଣ ଘଟଣାକ୍ରମେ କାଶ୍ମୀରରେ ମୁତୟନ ଥିବା ସେନାର କିଛି ୟୁନିଟକୁ ଯୁଦ୍ଧକାଳୀନ ଭିତ୍ତିରେ ଆସାମ, ମଣିପୁର, ମେଘାଳୟ କୁ ସ୍ଥାନାନ୍ତର କରାଯାଇଛି । ସ୍ଥାନାନ୍ତର ହୋଇଥିବା ୟୁନିଟକୁ ତୁରନ୍ତ ପୋଜିସନ ନେବାକୁ କଡା ନିର୍ଦ୍ଦେଶନାମା ଜାରି କରିଛି କେନ୍ଦ୍ର ଗୃହ ମନ୍ତ୍ରଣାଳୟ ।
