ଜୟପୁର: ରାଜସ୍ଥାନର ରାଜନୈତିକ ଡ୍ରାମା ଶେଷ ହେବାର ନାଁ ନେଉନାହିଁ । ଅଗଷ୍ଟ14ରୁ ଆରମ୍ଭ ହେବାକୁ ଥିବା ରାଜସ୍ଥାନ ବିଧାନସଭା ଅଧିବେଶନ ପୂର୍ବରୁ ସଚିନ ପାଇଲଟ ରାହୁଲ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀଙ୍କୁ ଦିଲ୍ଲୀରେ ଭେଟିଛନ୍ତି । ତେବେ ଏହାପରେ ସଚିନ ପାଇଲଟଙ୍କ ସମର୍ଥକମାନେ ସୋମବାର ରାତିରେ ଜୟପୁରକୁ ଫେରିବେ ବୋଲି କୁହାଯାଉଛି ।
ସେପଟେ ଲଗାତାର ବିଦ୍ରୋହୀ ଭାବରେ ସ୍ବର ଉତ୍ତୋଳନ କରିଥିବା ପାଇଲଟ କ୍ୟାମ୍ପର ବିଧାୟକ ଉଓଁର ଲାଲ ଶର୍ମା ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କୁ ଭେଟିଛନ୍ତି। ସେ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିଛନ୍ତି । ତେବେ ମୁଖ୍ୟମନ୍ତ୍ରୀଙ୍କ ସହ ଆଲୋଚନା ପରେ ନିଜ ସ୍ବର ବଦଳାଇଛନ୍ତି ଭଓଁରଲାଲ ଶର୍ମା । ଗେହଲଟ ସରକାର ସୁରକ୍ଷିତ ଅଛନ୍ତି, ସରକାରଙ୍କ ପାଇଁ କୌଣସି ବିପଦ ନଥିବା ସେ ଆଶ୍ବାସନା ଦେଇଛନ୍ତି ।
ଆଲୋଚନା ପରେ ଭଓଁର ଲାଲ ଶର୍ମା ଗଣମାଧ୍ୟମକୁ ସମ୍ବୋଧିତ କରି କହିଛନ୍ତି, ଆଜି ମୁଁ ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କୁ ଭେଟିଛି। ଦଳ ଏକ ପରିବାର ଏବଂ ଅଶୋକ ଗେହଲଟ ଏହାର ମୁଖ୍ୟ । ପରିବାରର କେହି ଜଣେ ସଦସ୍ୟ ରାଗିଗଲେ ଖାଦ୍ୟ ଖାଆନ୍ତି ନାହିଁ । ଆମେ ମାସେ ପାଇଁ ଅସନ୍ତୋଷ ବ୍ୟକ୍ତ କରିଥିଲୁ । କିନ୍ତୁ ବର୍ତ୍ତମାନ ଆମ ଅସନ୍ତୋଷ ଦୂର ହୋଇଯାଇଛି । ଦଳ ବର୍ତ୍ତମାନ ଜନସାଧାରଣଙ୍କୁ ଦେଇଥିବା ପ୍ରତିଶ୍ରୁତି ପୂରଣ କରିବ ବୋଲି ସେ କହିଛନ୍ତି ।
ସେ ଆହୁରି କହିଛନ୍ତି ଯେ, ଆମର କୌଣସି ଭିନ୍ନ ଶିବିର ନଥିଲା । ମୁଁ ଇଚ୍ଛା ଅନୁସାରେ ଯାଇଥିଲି ଏବଂ ଇଚ୍ଛା ଅନୁସାରେ ଫେରିଛି । ତେବେ ଭାଇରାଲ ଟେପ ସମ୍ପର୍କରେ ଭଓଁର ଲାଲ ଶର୍ମା କହିଛନ୍ତି, ମୁଁ ଅଡିଓ ବିଷୟରେ କିଛି ଜାଣି ନାହିଁ। ମୁଁ ଜଣେ ଗଜେନ୍ଦ୍ର ସିଂଙ୍କୁ ଜାଣେ । କିନ୍ତୁ ମୁଁ କୌଣସି ଶେଖୱତଙ୍କୁ ଜାଣି ନାହିଁ । ମୁଁ କୌଣସି ସଞ୍ଜୟ ଜୈନଙ୍କୁ ମଧ୍ୟ ଜାଣି ନାହିଁ । ମୋ ବିରୋଧରେ ଲାଗିଥିବା ଅଭିଯୋଗ ମିଛ ବୋଲି ସେ କହିଛନ୍ତି ।
ସୂଚନାଯୋଗ୍ୟ ଯେ, ରାଜସ୍ଥାନରେ ଘୋଡା ବେପାର ମାମଲାକୁ ନେଇ ସୋସିଆଲ ମିଡିଆରେ ଅଡିଓ ଭାଇରାଲ ହୋଇଥିଲା । ଏହି ଅଡିଓରେ ଭଓଁରଲାଲ ଶର୍ମାଙ୍କ ନାମ ସାମ୍ନାକୁ ଆସିଛି । ବିଧାୟକ ଶର୍ମା ବିଜେପି ନେତାଙ୍କ ସହ ଘୋଡାବେପାରରେ ସାମିଲ ଥିବା କଂଗ୍ରେସ ଦାବି କରିଛି ।
ବ୍ୟୁରୋ ରିପୋର୍ଟ ଇଟିଭି ଭାରତ
