ନୂଆଦିଲ୍ଲୀ: ସ୍ବାର୍ଥପର ଦୁନିଆରେ ସମସ୍ତେ ନିଜ ନିଜ ସ୍ବାର୍ଥରେ ବ୍ୟସ୍ତ। ନିଜ ଛଡା ଆଉ କଥା ଭାବିବାକୁ କି ଶୁଣିବାକୁ ସମୟ ନାହିଁ। ହେଲେ ସମାଜରେ ଆଜି ବି ଅନେକ ଲୋକ ଅଛନ୍ତି ଯିଏନିଜ ପାଇଁ ନୁହେଁ ବରଂଅନ୍ୟମାନଙ୍କ ପାଇଁ ଚିନ୍ତା କରନ୍ତି । ଅନ୍ୟମାନଙ୍କ କଷ୍ଟରେ କଷ୍ଟ ଅନୁଭବ କରନ୍ତି । ଏଭଳି ଏକ ଶିଶୁ ହେଉଛି ମିଜୋରାମର ସାଇରଙ୍ଗ । ବୟସ ବହୁତ କମ୍। ଶିଶୁଟି ଏକ କୁକୁଡା ଛୁଆର ଜୀବନ ବଞ୍ଚାଇବା ପାଇଁ ଯାହା କରିଛି ତାହା ସୋସିଆଲ ମିଡିଆରେ ବେଶ୍ ଭାଇରାଲ ହେବାର ଲାଗିଛି।
ସାଇରଙ୍ଗର ଏକ ଫଟୋ ବର୍ତ୍ତମାନ ସୋସିଆଲ ମିଡିଆରେ ଘୂରି ବୁଲୁଛି । ଫଟୋରେ ଦେଖାଯାଉଛି ସାଇରଙ୍ଗ ଗୋଟିଏ ହାତରେ ଏକ କୁକୁଡା ଛୁଆ ଓ ଅନ୍ୟ ହାତରେ କିଛି ଟଙ୍କା ଧରିଛି। ଏଇ ଫଟୋଟିକୁ ମିଜୋରାମର ଜଣେ ଯୁବକ ଫେସବୁକରେ ଅପଲୋଡ କରିଛନ୍ତି। ଆଉ ଫଟୋ କ୍ୟାପସନ୍ରେ ଲେଖିଛନ୍ତି, ‘ମିଜୋରାମର ଏକ ଶିଶୁ , ଯିଏକି ଭୁଲ ବଶତଃ ସାଇକେଲରେ ଏକ କୁକୁଡା ଛୁଆକୁ ଧକ୍କା ଦେଇଥିଲା । ଆଉ ତାପରେ କୁକୁଡାକୁ ଧରି ସ୍ଥାନୀୟ ମେଡିକାଲକୁ ଧାଇଁଥିଲା। ପାଖରେ ଥିବା ସମସ୍ତ ଟଙ୍କା ଦେଇ କୁକୁଡାର ଜୀବନ ବଞ୍ଚାଇ ଦେବାକୁ ସାହାଯ୍ୟ ମାଗିଥଲା । ମୁଁ ଏହା ଦେଖିହସିବା ସହ କାନ୍ଦିପକାଇଥିଲି ।’
ତେବେ ଯୁବକଙ୍କ ଏହି ପୋଷ୍ଟଟିକୁ ଏକ ଲକ୍ଷରୁ ଊର୍ଦ୍ଧ୍ୱ ଲାଇକ୍ ଓ 76 ହଜାରରୁ ଊର୍ଦ୍ଧ୍ୱ ସେୟାର କରାଯାଇଛି। ନିଷ୍ପାପ ଶିଶୁର କୁକୁଡା ପାଇଁ ଚିନ୍ତାକୁ ଲୋକେ ବହୁତ ପସନ୍ଦ କରିଛନ୍ତି । ଆଉ କମେଣ୍ଟ ମଧ୍ୟ କରିଛନ୍ତି ।
