ପ୍ରଧାନମନ୍ତ୍ରୀଙ୍କୁ ଭେଟିଲେ ନୋବେଲ ବିଜେତା ଅଭିଜିତ

ଅର୍ଥନୀତି କ୍ଷେତ୍ରରେ ନୋବେଲ ପାଇଥିବା ଅଭିଜିତ ବାନାର୍ଜୀ ଆଜି ପ୍ରଧାନମନ୍ତ୍ରୀଙ୍କୁ ସାକ୍ଷାତ କରିଛନ୍ତି । ଅଭିଜିତଙ୍କ ଉପଲବ୍ଧି ପାଇଁ ଦେଶ ଆଜି ଗର୍ବିତ ବୋଲି କହିଛନ୍ତି ମୋଦି ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭେଟିଛନ୍ତି ନୋବେଲ ବିଜେତା ଅଭିଜିତ ବାନାର୍ଜୀ । ପ୍ରଧାନମନ୍ତ୍ରୀଙ୍କ ବାସଭବନରେ ସୌଜନମୂଳକ ସାକ୍ଷାତ କରିଛନ୍ତି ଅଭିଜିତ ।

ଅଭିଜିତ ଜଣେ ସରଳ ଓ ଉତ୍ତମ ବ୍ୟକ୍ତି ବୋଲି କହିଛନ୍ତି ପ୍ରଧାନମନ୍ତ୍ରୀ । ତାଙ୍କ କଥାରୁ ହିଁ ସ୍ପଷ୍ଟ ବାରି ହୋଇପଡ଼ିଥିଲା ସେବା ପାଇଁ ଥିବା ଆଗ୍ରହ । ବିଭିନ୍ନ ବିଷୟରେ ଦୀର୍ଘ ସମୟ ଧରି ଅଭିଜିତଙ୍କ ବ୍ୟାପକ ଆଲୋଚନା ହୋଇଥିବା କହିଛନ୍ତି ମୋଦି ।

ନୋବେଲ ବିଜୟ ଭାରତ ପାଇଁ ଗର୍ବର ବିଷୟ । ତାଙ୍କ ଉପଲବ୍ଧି ପାଇଁ ଦେଶ ଆଜି ଗର୍ବିତ ବୋଲି କହିବା ସହ ଭବିଷ୍ୟତ ପାଇଁ ଶୁଭକାମନା ଜଣାଇଛନ୍ତି ପ୍ରଧାନମନ୍ତ୍ରୀ ।