ନୂଆଦିଲ୍ଲୀ: ବିଦେଶ ଫେରନ୍ତା ଡାକ୍ତରୀ ଛାତ୍ରଙ୍କ ଆତ୍ମହତ୍ୟା । କେରଳର କୋଟ୍ଟାୟାମର ଜଣେ ଡାକ୍ତରୀ ଛାତ୍ର ଋଷରୁ ଫେରି ହୋମ କ୍ବାରେଣ୍ଟାଇନରେ ଥିବାବେଳେ ଆତ୍ମହତ୍ୟା କରିଛନ୍ତି । ସେ ବେକରେ ରଶି ଲଗାଇ ଆତ୍ମହତ୍ୟା କରିଥିବା ଜଣାପଡିଛି ।
ମଙ୍ଗଳବାର ଏନେଇ ପୋଲିସ ସୂଚନା ଦେବାକୁ ଯାଇ କହିଛନ୍ତି ଯେ, ଡାକ୍ତରୀ ଯୁବକ ଜଣକ ଗତ କିଛିଦିନ ହେଲା ଋଷରୁ ଫେରି ହୋମ କ୍ବାରେଣ୍ଟାଇନରେ ରହୁଥିଲେ । ଆତ୍ମହତ୍ୟା କରିଥିବା ଯୁବକ ଜଣକ 20 ବର୍ଷୀୟ ଏମବିବିଏସ ଛାତ୍ର କୃଷ୍ଣପ୍ରିୟ ବୋଲି ଜଣାପଡିଛି ।
6 ଦିନ ପୂର୍ବରୁ ସେ ଋଷରୁ ଫେରି କେରଳ ସ୍ଥିତ ନିଜ ଘରକୁ ଫେରିଥିଲେ । ହୋମ କ୍ବାରେଣ୍ଟାଇନର ସୁବିଧା ନଥିବାରୁ ତାଙ୍କର ପୂରା ପରିବାର ନିଜ ସମ୍ପର୍କୀୟଙ୍କ ଘରକୁ କିଛିଦିନ ପାଇଁ ରହିବାକୁ ଚାଲିଯାଇଥିଲେ । ସେ ସୋମବାର ରାତିରେ ଘରେ ଏକୁଟିଆ ଥିବାବେଳେ ବେକରେ ରଶି ଲଗାଇ ଆତ୍ମହତ୍ୟା କରିଛନ୍ତି । ତାଙ୍କର କୋରୋନା ସାମ୍ପଲ ପରୀକ୍ଷା ପାଇଁ ନିଆଯାଇ ଥିବାବେଳେ ରିପୋର୍ଟ ଏପର୍ଯ୍ୟନ୍ତ ଆସିନାହିଁ । ତେବେ ତାଙ୍କର କୌଣସି କୋରୋନା ଲକ୍ଷଣ ନଥିବା ପୋଲିସ ପକ୍ଷରୁ ସୂଚନା ମିଳିଛି ।
