ଲକ୍ଷ୍ନୌ: ରାମ ଜନ୍ମଭୂମି ପରେ ଶ୍ରୀକୃଷ୍ଣ ଜନ୍ମଭୂମିକୁ ନେଇ ଏକ ମାମଲା ମଥୁରା କୋର୍ଟରେ ଦାଏର ହୋଇଥିଲା । ଯେଉଁଥିରେ ଶ୍ରୀକୃଷ୍ଣଙ୍କ ଜନ୍ମଭୂମି ପରିସରର ମାଲିକାନାକୁ ନେଇ ସୁପ୍ରିମକୋର୍ଟରେ ପ୍ରଭୁ ଶ୍ରୀକୃଷ୍ଣ ବିରାଜମାନ ପକ୍ଷରୁ ଶୁକ୍ରବାର ଦିନ ଏକ ମାମଲା ଦାଏର କରାଯାଇଥିଲା । ତେବେ ଆଜି ଏବି ଆବେଦନର ଶୁଣାଣି କରିବେ ମଥୁରା କୋର୍ଟର ବରିଷ୍ଠ ଡିଭିଜନ୍ ଜଜ୍ । ଏନେଇ ମନ୍ଦିର ପରିସରରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି । ପୁଣିଥରେ ଶ୍ରୀକୃଷ୍ଣ ମନ୍ଦିରକୁ ଲାଗି ରହିଥିବା ସାହି ଇଦ୍ଗାହ ମସଜିଦର ଉଚ୍ଛେଦକୁ ନେଇ ଦାବି ଜୋର ଧରିଛି । ଏଥିରେ ୧୩.୩୭ ଏକର ଜମିରେ ମାଲିକାନା ଦାବି କରାଯାଇଛି।
ସୂଚନାନୁସାରେ, ଆବେଦନକାରୀଙ୍କ ପକ୍ଷରୁ ରଞ୍ଜନ ଅଗ୍ନିହୋତ୍ରୀ ଏବଂ ଅନ୍ୟ ଛଅ ଜଣ ଏହି ଦେଵାନୀ ମାମଲାକୁ ଓକିଲ ହରିଶଙ୍କର ଜୈନ ଓ ବିଷ୍ଣୁ ଜୈନ ଦ୍ବାରା 58 ପୃଷ୍ଠାର ଆବେଦନ କରାଯାଇଥିଲା । ଯାହା ଆଜି(ସୋମବାର) ଶୁଣାଣି ହେବ । ଏବେ ଏହା ଦେଖିବାକୁ ପଡ଼ିବ ଯେ, କୋର୍ଟ ଏହା ଗ୍ରହଣ କରିବେ ନା ପିଟିସନ ଖାରଜ ହେବ।
