ଇମ୍ଫାଲ: ମଣିପୁର ରାଜନୀତିରେ ଉତ୍ତେଜନା ଜାରି ରହିଛି। ମୁଖ୍ୟମନ୍ତ୍ରୀ ଏନ ବିରେନ ସିଂ କଂଗ୍ରେସର ଜଣେ ବିଧାୟକ ଏବଂ 6 ଜଣ ପୂର୍ବତନ ବିଧାୟକଙ୍କୁ ନେଇ ଦିଲ୍ଲୀ ପହଞ୍ଚିଛନ୍ତି। ସେ ତାଙ୍କ ଚାର୍ଟାର୍ଡ ବିମାନରେ ଦିଲ୍ଲୀ ଆସିଛନ୍ତି। ତେବେ ଦିଲ୍ଲୀରେ ପହଞ୍ଚିବା ପରେ ମଣିପୁରରେ କୌଣସି ବଡ଼ ରାଜନୈତିକ ପରିବର୍ତ୍ତନ ହେବା ନେଇ ଚର୍ଚ୍ଚା ହେଉଛି।
ଏନ ବିରେନ ସିଂଙ୍କ ସହ ଦିଲ୍ଲୀ ପହଞ୍ଚିଥିବା ଏହି 6 ଜଣ ପୂର୍ବତନ ବିଧାୟକ ସେହି 8 ଜଣ ବିଧାୟକଙ୍କ ମଧ୍ୟରେ ସାମିଲ ଅଛନ୍ତି ଯିଏ ଅଗଷ୍ଟ 10 ରେ କଂଗ୍ରେସର ହ୍ବିପ୍କୁ ଉଲ୍ଲଂଘନ କରି ବିଧାନସଭା ଅଧିବେଶନରୁ ଦୂରେଇ ରହିଥିଲେ। ସେମାନଙ୍କ ଅନୁପସ୍ଥିତି ଯୋଗୁଁ ବିଜେପିର ଏନ ବିରେନ ସିଂ ସରକାର ଆସ୍ଥା ଭୋଟ୍ରେ ବିଜୟୀ ହୋଇଥିଲେ ।
ତେବେ ସ୍ବତନ୍ତ୍ର ଚାର୍ଟାର୍ଡ ବିମାନରେ ମୁଖ୍ୟମନ୍ତ୍ରୀଙ୍କ ସହ ଯାଇଥିବା କଂଗ୍ରେସ ବିଧାୟକ ମୁଖ୍ୟମନ୍ତ୍ରୀଙ୍କ ଅତି ନିକଟତର ବ୍ୟକ୍ତି ବୋଲି କୁହାଯାଉଛି। ତେବେ ଏନେଇ ବିରେନ ସିଂ କହିଛନ୍ତି, 6 ଜଣ ବିଧାୟକ କଂଗ୍ରେସରୁ ଇସ୍ତଫା ଦେଇଛନ୍ତି ଏବଂ ବିଜେପିରେ ଯୋଗଦେବାକୁ ଚାହୁଁଛନ୍ତି। ତେଣୁ ମୁଁ ସେମାନଙ୍କୁ ଏଠାକୁ ଆଣିଛି । ମୁଁ ଦଳର ସାଧାରଣ ସମ୍ପାଦକ ତଥା ଦଳର ରାଷ୍ଟ୍ରୀୟ ସଭାପତିଙ୍କୁ ଭେଟିବାକୁ ଚେଷ୍ଟା କରୁଛି। ବିରୋଧୀ ଅନେକ କଥା କହୁଛନ୍ତି କିନ୍ତୁ ଆମେ ଦେଶର ଗଣତାନ୍ତ୍ରିକ ବ୍ୟବସ୍ଥାକୁ ଉତ୍ସାହିତ କରୁଛୁ। ମଣିପୁରରେ ସବୁ ଠିକ୍ ଅଛି ବୋଲି ସେ କହିଛନ୍ତି ।
ମୁଖ୍ୟମନ୍ତ୍ରୀଙ୍କ ସହ ଦିଲ୍ଲୀ ଆସିଥିବା 6 ପୂର୍ବତନ ବିଧାୟକ ଅଗଷ୍ଟ 10ରେ ବିଧାନସଭାରୁ ଇସ୍ତଫା ଦେଇଥିଲେ । ଏହାପରେ ସେମାନେ ଅଗଷ୍ଟ 11ରେ କଂଗ୍ରେସ ଦଳ ଛାଡିଥିଲେ । ତେବେ ଏହି 6 ଜଣ ପୂର୍ବତନ ବିଧାୟକ ଏବଂ ଜଣେ କଂଗ୍ରେସ ବିଧାୟକଙ୍କୁ ବିଜେପିରେ ସାମିଲ କରାଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
