ମୁମ୍ବାଇ: ସ୍ଥାନୀୟ ଘାଟକୋପରରେ ଅଭାବନୀୟ ଘଟଣା । ଗୋଟିଏ ମାସର ଦରମା ନଦେବା ସହ ଚାକିରୀରୁ ବହିଷ୍କାର କରିବାର ପ୍ରତିଶୋଧ ନେଇଛି ଜଣେ କର୍ମଚାରୀ । ଏକ ଧାରୁଆ ଛୁରୀରେ ଆକ୍ରମଣ କରି ମାଲିକକୁ ହତ୍ୟା କରିଛି ସମ୍ପୃକ୍ତ କର୍ମଚାରୀ । ଖବର ପାଇ ଘଟଣାସ୍ଥଳରେ ପନ୍ତନଗର ପୋଲିସ ପହଞ୍ଚି ଅଭିଯୁ୍କ୍ତକୁ ଗିରଫ କରିବା ସହ ତଦନ୍ତ ଆରମ୍ଭ କରିଛି ।
ସୂଚନା ମୁତାବକ ପୂର୍ବ-ଘାଟକୋପରର ଶିବଶକ୍ତି ବିଲ୍ଡିଂରେ ଚାଲିଥିଲା ଏକ ପ୍ରାଇଭେଟ କୋଚିଂ ସେଣ୍ଟର । ଯାହାର ମାଲିକ ଥିଲେ ମୟଙ୍କ ମାଣ୍ଡୋତ ଏବଂ ଜଣେ କର୍ମଚାରୀ ଥିଲେ ଅଭିଯୁକ୍ତ ଗଣେଶ ପୱାର । ତେବେ କୌଣସି କାରଣରୁ କିଛି ଦିନ ତଳେ ହିଁ ଗଣେଶଙ୍କୁ ଚାକିରିରୁ ବାହାର କରିଥିଲେ ମୟଙ୍କ । ଏଥିସହ ତାଙ୍କୁ ଗୋଟିଏ ମାସର ଦରମା ମଧ୍ୟ ଦେଇନଥିଲେ ମାଲିକ ।
ଏଥିରେ ରାଗି ଗଣେଶ ସନ୍ଧ୍ୟା 7ଟା ସମୟରେ କୋଚିଂ ଚାଲିଥିବା ବେଳେ ଛାତ୍ରଛାତ୍ରୀଙ୍କ ସାମ୍ନାରେ ମୟଙ୍କଙ୍କୁ ଛୁରୀ ଭୁଷି ହତ୍ୟା କରିଥିଲା । ଛାତ୍ରଛାତ୍ରୀମାନେ ଏନେଇ ତୁରନ୍ତ ପୋଲିସକୁ ଖବର କରିବାରୁ ଘଟଣାସ୍ଥଳରେ ପହଞ୍ଚିଥିଲା ପନ୍ତନଗର ପୋଲିସ । ପୋଲିସ ପହଞ୍ଚି ପ୍ରଥମେ କ୍ଷତାକ୍ତ ମୟଙ୍କଙ୍କୁ ରଜୱାଡି ଡାକ୍ତରଖାନାରେ ଭର୍ତ୍ତି କରିଥିଲେ । ହେଲେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ ।
ପରେ ଅଭିଯୁକ୍ତ ଗଣେଶକୁ ଘଟଣାସ୍ଥଳରୁ ଗିରଫ କରିବା ସହ ଆଗକୁ ତଦନ୍ତ ଜାରି ରଖିଛି ପନ୍ତନଗର ପୋଲିସ । ଏନେଇ ସୂଚନା ଦେଇଛନ୍ତି ପନ୍ତନଗରର ବରିଷ୍ଠ ପୋଲିସ ଅଧିକାରୀ ଏସ୍ ଭଲେରାଓ ।
ବ୍ୟୁରୋ ରିପୋର୍ଟ, ଇଟିଭି ଭାରତ
