ଗାଜିଆବାଦ: ସାତଜନ୍ମର ସାଥି ହୋଇ ରହିବାର ପ୍ରତିଶୃତି ଦେଇଥିଲେ । ହେଲେ ନିଜେ ଜାଣିଶୁଣି ସବୁ କିଛି ମିଛରେ ପରିଣତ କରିଦେଲେ । ନା ସେ ଭଲ ସ୍ବାମୀ ହୋଇ ପାରିଲେ ନା ହିଁ ଭଲ ବାପା । ପତ୍ନୀ ଓ 3 କଅଁଳ ଶିଶୁଙ୍କ ଗଳା କାଟି ହତ୍ୟା କରିଛନ୍ତି ଏହି ନୃଶଂସ ବ୍ୟକ୍ତି । ହେଲେ ଏତିକିରେ ଶେଷ ହୋଇନି ତାଙ୍କର ବର୍ବରତା । ସମସ୍ତଙ୍କୁ ହତ୍ୟା କରିବା ପରେ ଭିଡିଓ ବନାଇ ନିଜ ଶାଳକଙ୍କ ପାଖକୁ ପଠାଇଥିଲେ ଅଭିଯୁକ୍ତ । ଏଭଳି ନୃଶଂସ ଘଟଣା ଦେଖିବାକୁ ମିଳିଛି ଉତ୍ତରପ୍ରଦେଶ ଗାଜିଆବାଦରେ ।
ଗାଜିଆବାଦର ଇନ୍ଦିରାପୁରୀରେ ରହୁଥିବା ଇଞ୍ଜିନିୟର ସୁମିତ କୁମାର ନିଜ ପତ୍ନୀ ଏବଂ ସନ୍ତାନଙ୍କୁ କରିଛନ୍ତି ହତ୍ୟା କରି ପରେ ଶାଳକଙ୍କୁ ଭିଡିଓ ପଠାଇବା ସହ ନିଜେ ଆତ୍ମହତ୍ୟା କରିବା କଥା ମଧ୍ୟ ଜଣାଇଥିଲେ । ସଙ୍ଗେ ସଙ୍ଗେ ଇନ୍ଦିରାପୁରୀ ପୋଲିସକୁ ଖବର ଦେବାପରେ ପୋଲିସ ଘଟଣାସ୍ଥଳରେ ପହଞ୍ଚିଥିଲା । ହେଲେ ସୁମିତ ଫେରାର ହୋଇଯାଇଥିଲେ ।
ତେବେ ସୁମିତ ଏପରି କରିବାର କାରଣ ଜଣାପଡିନାହିଁ । କିନ୍ତୁ ଟେଲିଭିଜନର କୌଣସି ସିରିଏଲକୁ ଦେଖି ସେ ଏପରି ହତ୍ୟା କରିଥିବା ଜଣାପଡିଛି । ବର୍ତ୍ତମାନ ପୋଲିସ ଏହି ଘଟଣାର ତଦନ୍ତ ଆରମ୍ଭ କରିଛି ।
