ଭୋପାଳ: ମାନସିକ ବିକାରଗ୍ରସ୍ତ ଯୁବକଙ୍କ ଉନ୍ମୁ୍ତ୍ତକାଣ୍ଡ । ମଧ୍ୟପ୍ରଦେଶର ରାଜଧାନୀ ଭୋପାଳ ବିମାନବନ୍ଦରରେ ସୁରକ୍ଷାକୁ ନେଇ ଏବେ ପ୍ରଶ୍ନ ଉଠିଛି । ଯୁବକ ଜଣଙ୍କ ବିମାନ ବନ୍ଦର ପରିସରରେ ପଶି ହେଲିକପ୍ଟରକୁ ଭଙ୍ଗାରୁଜା କରିଛି ।
ଭୋପାଲ ବିମାନବନ୍ଦରରେ ମାନସିକ ବିକାରଗସ୍ତ ଯୁବକଙ୍କ ଉନ୍ମୁ୍ତ୍ତକାଣ୍ଡ, ଭଙ୍ଗିଲା ହେଲିକପ୍ଟର
ରାଜଭୋଜ ବିମାନବନ୍ଦର ସୁରକ୍ଷାର ଢିଲାପଣର ଫାଇଦା ନେଇ ଏହି ଯୁବକ ଜଣଙ୍କ ବିମାନ ବନ୍ଦର ପରିସରରେ ପ୍ରବେଶ କରି ଛିଡା ହୋଇଥିବା ଏକ ହେଲିକେପ୍ଟରକୁ ଭଙ୍ଗାରୁଜା କରିଛି । ସୁରକ୍ଷା ବ୍ୟବସ୍ଥା କଡାକଡି କରାଯାଇଥିବା ବିମାନବନ୍ଦର କର୍ତ୍ତୃପକ୍ଷ ଦାବି କରିଛନ୍ତି କିନ୍ତୁ ବିମାନବନ୍ଦରର ପଛପଟୁ ବହୁ ସମୟରେ ଲୋକଙ୍କ ସହ ପଶୁପକ୍ଷୀଙ୍କ ମଧ୍ୟ ଯିବା ଆସିବା ଦେଖାଯାଇଛି ।
ଘଟଣାସ୍ଥଳରେ ସୁରକ୍ଷାରେ ନିୟୋଜିତ ରହିଥିବା ସିଆଇଏସଏଫର ଯବାନ ମାନେ ଉକ୍ତ ଯୁବକଙ୍କୁ ତତ୍କାଳ ଧରିଥିଲେ ଏବଂ ଗାନ୍ଧୀନଗର ପୋଲିସରେ ଜିମା ଦେଇଥିଲେ । ତେବେ ଯୁବକ ଜଣଙ୍କ କାହିଁକି ଏଭଳି କଲା ପୋଲିସ ତାହା ଜାଣିବାକୁ ପଚରାଉଚରା ଜାରି ରଖିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
