ଲଣ୍ଡନ: କ୍ୟାନ୍ସର ନାଁ ଶୁଣିଲେ ହିଁ ଭୟରେ ଥରି ଉଠେ ଛାତି । ଯାହାର କେବଳ ଚିନ୍ତା ହିଁ ଜଣଙ୍କୁ ମାନସିକ ଅସୁସ୍ଥ କରିବା ପାଇଁ ଯଥେଷ୍ଟ । ତେବେ କ୍ୟାନ୍ସର ବିଭିନ୍ନ ପ୍ରକାର ରହିଥିବା ବେଳେ ମହିଳାଙ୍କ କ୍ଷେତ୍ରରେ ସ୍ତନ କର୍କଟର ମାତ୍ରା କିଛି କମ ନୁହେଁ । ଏହାର ସମାଧାନ ପାଇଁ ଡାକ୍ତରୀ ବିଜ୍ଞାନ ଆଣିଛି ନୂଆ ପନ୍ଥା । ପ୍ରାୟ ଏକ ମିଲିୟନ ମହିଳାଙ୍କୁ ନେଇ ହୋଇଥିବା ଏକ ଅଧ୍ୟୟନରୁ ଜଣା ପଡିଛି କି ସମୟ ପୂର୍ବରୁ ମାମୋଗ୍ରାଫି ସ୍କ୍ରିନିଂ କରିବା ଦ୍ବାରା ଅନେକ ମହିଳାଙ୍କ କ୍ଷେତ୍ରରେ ସ୍ତନ କର୍କଟର ସମ୍ଭାବନା କମିଥାଏ ।
ଏନେଇ କ୍ୟାନ୍ସର ଜର୍ଣ୍ଣାଲରେ ପ୍ରକାଶିତ ତଥ୍ୟ ମୁତାବକ ସ୍ବିଡେନରେ ମାମୋଗ୍ରାଫିର ସୁଯୋଗ ପାଇଥିବା ଅନେକ ମହିଳାଙ୍କୁ ନେଇ ଏକ ଅଧ୍ୟୟନ ହୋଇଥିଲା । ଏହି ମହିଳାମାନଙ୍କ କହିବା ଅନୁଯାୟୀ ଏହି ମାମୋଗ୍ରାଫି ସ୍କ୍ରିନିଂ ଦ୍ବାରା ସ୍ତନ କର୍କଟର ସମ୍ଭାବନା କମ ହୋଇଥାଏ । ଅଧ୍ୟୟନରେ ସାମିଲ 5,49,091 ମହିଳାଙ୍କ ମଧ୍ୟରେ ଡାକ୍ତରମାନେ ସ୍ତନ କର୍କଟ ନେଇ ବିଭିନ୍ନ ପରୀକ୍ଷା କରିଥିଲେ । ଅନେକ କ୍ଷେତ୍ରରେ 10ବର୍ଷର ଚିକିତ୍ସା ପରେ ବି ସ୍ତନ କର୍କଟ ଠିକ ହୋଇନଥିବା ବେଳେ ଅନେକ କ୍ଷେତ୍ରରେ ପ୍ରାରମ୍ଭିକ ଚିକିତ୍ସା ଦ୍ବାରା ଏହାକୁ ରୋକାଯାଇପାରୁଥିବା ଦେଖାଯାଇଥିଲା ।
ତେବେ ଅନେକ କ୍ଷେତ୍ରରେ ଚିକିତ୍ସା ପରେ ବି ମହିଳାମାନେ ପୁଣି ସ୍ତନ କର୍କଟରେ ପୀଡିତ ହୋଇଥାଆନ୍ତି । ଏନେଇ ଅଧ୍ୟୟନରେ ଦେଖାଯାଇଥିଲା କି ଚିକିତ୍ସାର 10 ବର୍ଷ ପରେ 41 ପ୍ରତିଶତ ମହିଳା କର୍କଟରୁ ସମ୍ପୂର୍ଣ୍ଣ ସୁସ୍ଥ ହୋଇଥିବା ବେଳେ ମାମୋଗ୍ରାଫି ସ୍କ୍ରିନିଂ ଦ୍ବାରା 25 ପ୍ରତିଶତ ମହିଳା ସମ୍ପୂର୍ଣ୍ଣ ସୁସ୍ଥ ହୋଇଥିଲେ । ଏହାପଛରେ ଏକ କାରଣ ହେଉଛି ଉଭୟ ପରୀକ୍ଷାରେ ସାମିଲ ମହିଳାଙ୍କ ସଂଖ୍ୟାରେ ତଫାତ । ଅନେକ ମହିଳା ସ୍କ୍ରିନିଂର ସୁଯୋଗ ପାଇନଥିବାରୁ ସଫଳତାର ମାତ୍ରା କମ ହୋଇଥିବା ଡାକ୍ତରମାନେ ଅନୁମାନ କରିଛନ୍ତି । ତେଣେ ଏନେଇ ଡାକ୍ତରମାନେ କହିଛନ୍ତି କି ଏହି ସ୍କ୍ରିନିଂ ଦ୍ବାରା ମହିଳାମାନେ ସମୟ ପୂର୍ବରୁ କ୍ୟାନ୍ସରର ଖବର ପାଇପାରିବେ ଓ ଏହାର ଚିକିତ୍ସା ମଧ୍ୟ ଆରମ୍ଭ କରିପାରିବେ । ଯାହା ସ୍ତନ କର୍କଟରେ ପୀଡିତଙ୍କ ସଂଖ୍ୟା ହ୍ରାସ କରିବାରେ ଅନେକ ସହାୟକ ହେବ ।
@IANS
