ଲକ୍ଷ୍ନୌ: ତେଜସ ଟ୍ରେନକୁ ଝଟକା । କୋରୋନା ମହାମାରୀ ମଧ୍ୟରେ ଦୀର୍ଘ 7 ମାସ ପରେ ତେଜସ ଟ୍ରେନ ଟ୍ରାକରେ ଗଡିଥିଲା। ମାତ୍ର ଆଶା ଅନୁଯାୟୀ ଯାତ୍ରୀ ଏହି ଟ୍ରେନରେ ଯାତ୍ରା କରୁନଥିବାରୁ ଆଇଆରସିଟିସିକୁ ବଡ ଝଟକା ଲାଗିଛି ।
ଅକ୍ଟୋବର 17ରେ ତେଜସ ଟ୍ରେନ ଚଳାଚଳ କରିଥିଲା । ପର୍ବପର୍ବାଣୀ ଥିବାରୁ ଏହି ଟ୍ରେନରେ ବହୁ ସଂଖ୍ୟକ ଯାତ୍ରୀ ଯାତାୟତ କରିବା ନେଇ ଆଇଆରସିଟିସି ଆଶାବାଦୀ ଥିଲା । ମାତ୍ର ବର୍ତ୍ତମାନ ମାତ୍ର 25 ରୁ 30 ପ୍ରତିଶତ ଯାତ୍ରୀ ଏହି ଟ୍ରେନରେ ଯାତ୍ରା କରୁଛନ୍ତି । ଯାହା ଆଇଆରସିଟିସିକୁ ଏକ ବଡ ଝଟକା ।
ପ୍ରତିଦିନ ଏହି ଟ୍ରେନରେ 150 ରୁ 170 ଯାତ୍ରୀ ଲକ୍ଷ୍ନୌରୁ ଦିଲ୍ଲୀକୁ ଯାତ୍ରା କରୁଛନ୍ତି । ସେହିପରି ଦିଲ୍ଲୀରୁ ଲକ୍ଷ୍ନୌକୁ ଆସୁଥିବା ଏହି ଟ୍ରେନର ମଧ୍ୟ ସମାନ ପରିସ୍ଥିତି ।
ଏପଟେ ଆଇଆରସିଟିସି ଅଧିକାରୀ କହିଛନ୍ତି, କୋରୋନା ସ୍ଥିତିରେ ସୁଧାର ଆସିଲେ ଯାତ୍ରୀ ଏହି ଟ୍ରେନରେ ଯାତାୟତ କରିବେ । ପୂର୍ବଭଳି ତେଜସ୍ ଏକ୍ସପ୍ରେସକୁ ବହୁ ଲାଭ ମିଳିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
