ନୂଆଦିଲ୍ଲୀ: ସ୍ଥାନୀୟ ଶାହଦରା ଷ୍ଟେସନରେ ଜନୈକ ଲୋକୋ ପାଇଲଟଙ୍କ ଉପରକୁ ଲୋକେ ପଥର ଫୋପାଡି ଆକ୍ରମଣ କରିଛନ୍ତି। ଆକ୍ରମଣ ଏତେ ଭୟଙ୍କର ଥିଲା କି ଲୋକୋ ପାଇଲଟଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ଏନେଇ ରେଳବାଇ ସୁରକ୍ଷାବଳ(ଆରପିଏଫ) ଏକ ମାମଲା ରୁଜୁ କରି ଏ ଘଟଣାର ଖୋଳତାଡ ଆରମ୍ଭ କରାଯାଇଛି।
ଶୁକ୍ରବାର ସନ୍ଧ୍ୟାରେ ଗାଡି ସଂଖ୍ୟା 15035 ଉତ୍ତରାଞ୍ଚଳ ସମ୍ପର୍କ କ୍ରାନ୍ତି ଏକ୍ସପ୍ରେସ ଶାହଦରା ଷ୍ଟେସନ ଦେଇ ଯିବା ସମୟରେ ଏହି ଘଟଣା ଘଟିଥିଲା । ଷ୍ଟେସନରେ ନାଲି ସଙ୍କେତ ଥିବାରୁ ଟ୍ରେନଟି ଧିରେ ଗତି କରୁଥିଲା । ଏହି ସମୟରେ ସୁଯୋଗ ପାଇ କେତେକ ଦୁର୍ବୃତ୍ତ ଲୋକୋ ପାଇଲଟଙ୍କ କ୍ୟାବିନ ଉପରକୁ ଢେଲା ପଥର ଫୋପାଡିଥିଲେ। ଫଳରେ ଲୋକେ ପାଇଲଟ କରମ ଚାନ୍ଦଙ୍କ ଗଭୀର କ୍ଷତ ହୋଇଥିଲା । ପରେ ତାଙ୍କୁ ଆଇସିୟୁରେ ଭର୍ତ୍ତି କରାଯାଇଥିଲା ।
ଏନେଇ ଆରପିଏଫର ବରିଷ୍ଠ ସୁରକ୍ଷା କମାଣ୍ଡାଣ୍ଟ ଏ ଏନ ଝାଙ୍କ କହିବା ଅନୁଯାୟୀ ଘଟଣା ପରେ ଆରପିଏଫ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ଏହି ଆକ୍ରମଣ ସ୍ଥାନୀୟ ଅଞ୍ଚଳର କିଛି ବାସିନ୍ଦା କରିଥିବା ନେଇ ସନ୍ଦେହ କରାଯାଉଥିବା ସେ କହିଛନ୍ତି।
ବ୍ୟୁରୋ ରିପୋର୍ଟ, ଇଟିଭି ଭାରତ
