ମୁମ୍ବାଇ: କୋରୋନା ସଂକ୍ରମଣକୁ ରୋକିବା ପାଇଁ ସାରା ଦେଶ ବର୍ତ୍ତମାନ ଲକଡାଉନ । ଦୋକାନ ବଜାରଠାରୁ ଆରମ୍ଭ କରି ଛୋଟ ବଡ ସମସ୍ତ ବ୍ୟବସାୟ ଏବେ ବନ୍ଦ । ଏମିତିରେ କେତେ ଯେ ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି ତାହାର କୌଣସି ଠିକଣା ନାହିଁ । ନିକଟରେ ମୁମ୍ବାଇରେ ଲକଡାଉନ ସମୟରେ ଦେଖିବାକୁ ମିଳିଛି ଅତି ଦୁଃଖଦ ଘଟଣା ।
ମହାରାଷ୍ଟ୍ରର ସିନ୍ଧୁଦୁର୍ଗ ଜିଲ୍ଲାରେ ଜଣେ ପତ୍ନୀ 490 କିଲୋମିଟର ଦୂରରେ ରହି ଭିଡିଓ କଲରେ ଦେଖିଛନ୍ତି ନିଜ ସ୍ବାମୀଙ୍କ ଅନ୍ତ୍ୟେଷ୍ଟି କ୍ରିୟା । ଘଟଣା ଅନୁଯାୟୀ ଦୋଦାମାର୍ଗ ତହସିଲ ଅନ୍ତର୍ଭୁକ୍ତ ମୋରଲେ ଗ୍ରାମରେ ବସବାସ କରନ୍ତି ଏହି ଚନ୍ଦ୍ରକାନ୍ତ ବାନ୍ଦେକର ଓ ପତ୍ନୀ ବାସନ୍ତୀ ବାନ୍ଦେକର । ହେଲେ ମୁମ୍ବାଇରେ ରହୁଥିବା ନିଜ ପୁଅକୁ ଦେଖା କରିବା ପାଇଁ ଚନ୍ଦ୍ରକାନ୍ତ ଯାଇଥିବା ବେଳେ ଗତ ମାର୍ଚ୍ଚ 22ରେ ସେ କ୍ୟାନ୍ସରରେ ପୀଡିତ ଥିବା ଜାଣିବାକୁ ପାଇଥିଲେ । ମା’ ଏକୁଟିଆ ଗାଁରେ ଥିବାରୁ ତାଙ୍କୁ ଏହା ଜଣାଇନଥିଲେ ବାପ ଓ ପୁଅ ।
କିନ୍ତୁ କିଏ ଜାଣିଥିଲା କି ପରିସ୍ଥିତି ଯୋଗୁଁ ବାଧ୍ୟ ହୋଇ ଲକଡାଉନ ସମୟ ସୀମା ବଢିବ ଓ ଏହି ଭିତରେ ଶେଷ ନିଃଶ୍ବାସ ତ୍ୟାଗ କରିବେ ଚନ୍ଦ୍ରକାନ୍ତ । ଗତ ଏପ୍ରିଲ 16 ରେ ଚନ୍ଦ୍ରକାନ୍ତ ନିଜ ଶେଷ ନିଃଶ୍ବାସ ତ୍ୟାଗ କରିଥିବା ବେଳେ ଲକଡାଉନ ଯୋଗୁଁ ତାଙ୍କୁ ଗାଁ ଆଣିବା ଅସମ୍ଭବ ହୋଇପଡିଥିଲା । ଫଳରେ ବାଧ୍ୟ ହୋଇ ଭିଡିଓ କଲରେ ନିଜ ସ୍ବାମୀଙ୍କ ଶେଷ ଦର୍ଶନ କରିଥିଲେ ବାସନ୍ତୀ ।
ବ୍ୟୁରୋ ରିପୋର୍ଟ, ଇଟିଭି ଭାରତ
