ଶ୍ରୀନଗର: ବଡଗାମରେ ଆତଙ୍କବାଦୀଙ୍କ ଗୁଳିରେ ପ୍ରାଣ ହରାଇଥିବା ବିଜେପି ନେତା ଅବଦୁଲ ହମୀଦ ନଜରଙ୍କ ମୃତ୍ୟୁ ଘଟଣାକୁ କଡା ନିନ୍ଦା କରିଛନ୍ତି ଜମ୍ମୁ ଓ କାଶ୍ମୀରର ନବନିଯୁକ୍ତ ଉପରାଜ୍ୟପାଳ ମନୋଜ ସିହ୍ନା । ଏହି ହତ୍ୟାକାଣ୍ଡକୁ ନେଇ ସିହ୍ନା ଗଭୀର ଶୋକ ପ୍ରକାଶ କରି କହିଛନ୍ତି ଯେ ଏହି ଘୃଣ୍ୟକାର୍ଯ୍ୟ ଭୟ ବିସ୍ତାର କରିବାର ପ୍ରୟାସ ଏବଂ ଏଭଳି ଆକ୍ରମଣକୁ ବରଦାସ୍ତ କରାଯିବନି ବୋଲି ସେ ପ୍ରତିକ୍ରିୟା ଦେଇଛନ୍ତି ।
ଏଲଜି କହିଛନ୍ତି ହିଂସା ଘଟାଇଥିବା ଅପରାଧିଙ୍କ ପାଇଁ ସମାଜରେ କୌଣସି ସ୍ଥାନ ନାହିଁ । ଦୋଷୀଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ ଜୋର ଦେଇ କହିଛନ୍ତି ।
ଏକ ସମବେଦନା ବାର୍ତ୍ତାରେ ସିହ୍ନା ଶୋକସନ୍ତପ୍ତ ପରିବାରବର୍ଗଙ୍କୁ ଗଭୀର ସମବେଦନା ଜଣାଇବା ସହ ଦିବଙ୍ଗତ ଆତ୍ମାର ଶାନ୍ତି ପାଇଁ ପ୍ରାର୍ଥନା କରିଛନ୍ତି ।
ରବିବାର ଆତଙ୍କବାଦୀ ଆକ୍ରମଣରେ ଆହତ ହୋଇଥିବା ନଜର ସୋମବାର ସକାଳେ ଜୀବନ ମୃତ୍ୟୁର ସଂଗ୍ରାମରେ ହାରିଯାଇଥିଲେ । ଆଭ୍ୟନ୍ତରୀଣ କାଶ୍ମୀରର ବଡଗାମରେ ମୋହିନ୍ଦପୋରା ଅଞ୍ଚଳରେ ନଜରଙ୍କୁ ଆତଙ୍କବାଦୀମାନେ ଗୁଳି କରିଥିଲେ ।
