ଥିରୁଅନନ୍ତପୁରମ: ଶିଶୁମାନଙ୍କ ଶିକ୍ଷା ଦିଗରେ କେତେ କ’ଣ ପଦକ୍ଷେପ ନିଆଯାଉଥିବା ସତ୍ତ୍ବେ ଆଜି ବି ଶିକ୍ଷାର ପ୍ରଣାଳୀକୁ ପିଲାଙ୍କ ପାଖରେ ରୋଚକ କରିବା ଅନେକ ସ୍ଥାନରେ ସମ୍ଭବ ହୋଇପାରିନାହିଁ । ପ୍ରତ୍ୟେକ ଶିଶୁଙ୍କ ଶିକ୍ଷା ଗ୍ରହଣ କରିବାର ପ୍ରକ୍ରିୟା ଭିନ୍ନ ହୋଇଥିବା ବେଳେ ସେମାନଙ୍କ ପାଇଁ ପାଠ ପଢା ଶୈଳୀକୁ ଭିନ୍ନ ଓ ଆକର୍ଷଣୀୟ କରିବା ପାଇଁ ଆଗେଇ ଆସିଛି କେରଳର ମଲ୍ଲପୁରମ ଜିଲ୍ଲାରେ ଥିବା ଏକ କିଣ୍ଡରଗାର୍ଟେନ । ଆପଣ କେବେ ଭାବିଛନ୍ତି କି, ବନ୍ୟପ୍ରାଣୀ ହେଉ କିମ୍ବା ଗୃହପାଳିତ ପଶୁ ଅବା ସେ ପୃଥିବୀ ସମ୍ବନ୍ଧୀୟ କୌଣସି ବି ବିଷୟ ହେଉ, ଏଗୁଡିକୁ ପଢିବା ସମୟରେ ସେମାନଙ୍କୁ ପ୍ରତ୍ୟକ୍ଷ ଶ୍ରେଣୀଗୃହରେ ଦେଖିବା ? କଥାଟି ସାମାନ୍ୟ ଆଶ୍ଚର୍ଯ୍ୟ ଲାଗୁଥିଲେ ବି ଏହାକୁ ସତ କରି ଦେଖାଇଛନ୍ତି ମଲ୍ଲପୁରମ ଜିଲ୍ଲାର କିଣ୍ଡରଗାର୍ଟେନ ।
ଏଠାରେ ବନ୍ୟପ୍ରାଣୀ ବା ଗୃହପାଳିତ ପଶୁ ଓ ସାମାଜିକ ବିଜ୍ଞାନରେ ବ୍ୟବହୃତ ପ୍ରାୟ ପ୍ରତ୍ୟେକ ଉପାଦାନକୁ ସହଜରେ ବୁଝିବା ପାଇଁ ସେମାନଙ୍କ ଏକ 3-ଡି ଛବିକୁ ଶ୍ରେଣୀ ଗୃହରେ ବ୍ୟବହାର କରାଯାଉଥିବା ଦେଖାଯାଇଛି । ଯାହା ଶିଶୁଙ୍କ ପଢିବା ପ୍ରଣାଳୀକୁ ଅଧିକ ଆକର୍ଷଣୀୟ କରିବା ସହ ଶିକ୍ଷାଦାନ ପ୍ରକ୍ରିୟାକୁ ଏକ ନୂଆ ସ୍ତରରେ ପହଞ୍ଚାଇଛି । ଏନେଇ ମଲ୍ଲପୁରମର ଏଇଏମ ଏୟୁପି ସ୍କୁଲରେ ସାମାଜିକ ବିଜ୍ଞାନ ଶିକ୍ଷକ ଶ୍ୟାମ ଭେଙ୍ଗାଲୋଟ ପିଲାଙ୍କୁ ପଢାଇବାର ଏକ ନୂଆ ପ୍ରଣାଳୀ ଖୋଜି ବାହାର କରିଛନ୍ତି ।
କୋରୋନା ମହାମାରୀ ସମୟରେ ବର୍ତ୍ତମାନ ଅନଲାଇନ କ୍ଲାସ ଚାଲିଥିବା ବେଳେ ପଢାକୁ ଅଧିକ ଆକର୍ଷଣୀୟ କରିବା ପାଇଁ ସେ ପାଠ୍ୟକ୍ରମରେ ଅଗମେଣ୍ଟେଡ ରିଆଲିଟିକୁ ସାମିଲ କରିଛନ୍ତି । ଏହି ଆର୍ଟ ଟେକ୍ନୋଲୋଜିର ବ୍ୟବହାର କରି ଭେଙ୍ଗାଲୋର କହିଛନ୍ତି କି ସେ ଛାତ୍ରଛାତ୍ରୀମାନଙ୍କୁ ଏକ ଉନ୍ନତ ଶୈଳୀରେ ଶିକ୍ଷା ଯୋଗାଇବାକୁ ଚାହାନ୍ତି । ପ୍ରାୟ 2ମାସର ପରିଶ୍ରମ ପରେ ସେ ଏହି ଟେକ୍ନୋଲୋଜିକୁ ବ୍ୟବହାର କରିବାରେ ସକ୍ଷମ ହୋଇଛନ୍ତି । ଏହାର ବ୍ୟବହାର ଦ୍ବାରା ସ୍କୁଲ ଦ୍ବାରା ପରିଚାଳିତ ଅନଲାଇନ କ୍ଲାସକୁ ପିଲାମାନେ ଉତ୍କଣ୍ଠାର ସହ ଅପେକ୍ଷା କରିବସୁଛନ୍ତି । ସେ ପୃଥିବୀ ହେଉ ବା ପଶୁ ପକ୍ଷୀ, ପ୍ରତ୍ୟେକକୁ ଦେଖିଲେ ପିଲାମାନେ ଖୁସିରେ ସେହି ବିଷୟକୁ ଜାଣିବା ପାଇଁ ଇଚ୍ଛା ପ୍ରକାଶ କରୁଛନ୍ତି ।
ଏହି ଟେକ୍ନୋଲୋଜିରେ କମ୍ପ୍ୟୁଟର ଦ୍ବାରା ଜେନେରେଟ ହୋଇଥିବା ଫଟୋକୁ ୟୁଜର୍ସଙ୍କ ପାଇଁ ଜୀବନ୍ତ ଛବି ଆକାରରେ ଦେଖାଯାଇଥାଏ । ସେପଟେ ଜୁନ 1ରୁ କେରଳ ସରକାର ‘ଫର୍ଷ୍ଟ ବେଲ’ ନାମରେ ଅନଲାଇନ କ୍ଲାସ ପ୍ରକ୍ରିୟା ଆରମ୍ଭ କରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
