ଶ୍ରୀନଗର: ବିଶ୍ବର ସର୍ବୋଚ୍ଚ ପର୍ବତ ମାଉଣ୍ଟ ଏଭେରେଷ୍ଟ ଚଢିବାକୁ ଦେଖିଛନ୍ତି ସ୍ବପ୍ନ । ହେଲେ ବାଧା ସାଜିଛି ଅର୍ଥ । ସରକାର ମଧ୍ୟ କୌଣସି ସହାୟତାର ହାତ ବଢାଉ ନାହାନ୍ତି । କିନ୍ତୁ ଇଚ୍ଛା ଶକ୍ତି ଆଗରେ ହାର ମାନିଯାଇଛି ଆର୍ଥିକ ଅଭାବ । ନିଜ ସ୍ବପ୍ନ ପୂରଣ କରିବା ଲକ୍ଷ୍ୟରେ ଅନଲାଇନ ଫଣ୍ଡିଂ ଅଭିଯାନର ସାହାରା ନେଇଛନ୍ତି କାଶ୍ମୀର ଝିଅ ନାହିଦା ।
ଶ୍ରୀନଗର ଜେବନ ଅଞ୍ଚଳରେ ଏକ ମଧ୍ୟମ ବର୍ଗ ପରିବାରରେ ଜନ୍ମ ଗ୍ରହଣ କରିଥିବା 23 ବର୍ଷିୟା ନାହିଦା ମଞ୍ଜୁରଙ୍କ ଗୋଟିଏ ସ୍ବପ୍ନ । ମାଉଣ୍ଟ ଏଭେରେଷ୍ଟ ଚଢି ସେଠାରେ ଉଡାଇବେ ତ୍ରିରଙ୍ଗା ।
10 ବର୍ଷ ବୟସରୁ ହିଁ ଟ୍ରାକିଂ କରିଆସୁଛନ୍ତି ନାହିଦା । 2017 ମସିହାରେ ସେ ଆନୁଷ୍ଠାନିକ ଭାବେ ଟ୍ରାକିଂ ପ୍ରଶିକ୍ଷଣ ନେଇଥିଲେ । କାଶ୍ମୀରର ପ୍ରଥମ ମହିଳା ପର୍ବତାରୋହୀ ହେବାର ସ୍ବପ୍ନ ପୂରଣ କରିବା ଦିଗରେ ସମସ୍ତଙ୍କ ସମର୍ଥନ ଲୋଡିଛନ୍ତି ସେ ।
ନାହିଦାଙ୍କ କହିବା ଅନୁଯାୟୀ, ସେ www.ketto.org ନାମକ ୱେବସାଇଟରେ ଅନଲାଇନ ଫଣ୍ଡିଂ ସାହାଯ୍ୟରେ ଟଙ୍କା ଜମା କରୁଛନ୍ତି । ନିଜ ସ୍ବପ୍ନ ପୂରଣ କରିବା ପାଇଁ ଯେ କୌଣସି ପରିସ୍ଥିତିର ସାମ୍ନା କରିବାକୁ ପ୍ରସ୍ତୁତ ଥିବା ସେ କହିଛନ୍ତି ।
