ଶ୍ରୀନଗର: 150ତମ ଗାନ୍ଧୀ ଜୟନ୍ତୀରେ ଦେଶରେ ଆରମ୍ଭ ହୋଇଛି ସ୍ବଚ୍ଛତା ଝଡ । ସମଗ୍ର ଦେଶରେ ଆରମ୍ଭ ହୋଇଛି ସ୍ବଚ୍ଛତା ଓ ଫିଟନେସ ଅଭିଯାନ । ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଫିଟନେସ ମନ୍ତ୍ର ଓ ସ୍ବଚ୍ଛ ଭାରତ ଅଭିଯାନର ଏକ ମିଳିତ ଅଭିଯାନ ‘ପ୍ଲଗିଙ୍ଗ ରନ୍’ ମଧ୍ୟ ଆରମ୍ଭ ହୋଇଛି । ଏହି ଅଭିଯାନର ଲକ୍ଷ୍ୟ ରହିଛି ଦେଶରେ କୋଣ ଅନୁକୋଣରେ ଫିଟନେସ ସହ ସ୍ବଚ୍ଛତାର ବାର୍ତ୍ତା ପହଞ୍ଚାଇବା ।
ତେବେ ପ୍ରଧାନମନ୍ତ୍ରୀଙ୍କ ଏହି ମହତ ଉଦ୍ଦେଶ୍ୟକୁ ହୃଦୟଙ୍ଗମ କରିପାରିଛନ୍ତି କଶ୍ମୀରର ହ୍ବିଲଚେୟାର ବାସ୍କେଟବଲ ଖେଳାଳୀ ଇନଶାହ ବସିର । ନିଜ ହ୍ବିଲ ଚେୟାରରେ ବସି ଇନଶାହଙ୍କ ସଫେଇ ଅଭିଯାନର ଏକ ଭିଡିଓ ଏବେ ସୋସିଆଲ ମିଡିଆରେ ସାଉଣ୍ଟିବାରେ ଲାଗିଛି ଲୋକଙ୍କ ପ୍ରଶଂସା । କେବଳ ଯେ ନିଜ ହ୍ବିଲ ଚେୟାରରେ ବସି ଇନଶାହ ସଫେଇ କରୁଛନ୍ତି ତାହା ନୁହେଁ, ସେ ସମଗ୍ର ଦେଶବାସୀଙ୍କୁ ମଧ୍ୟ ସଫେଇ ଅଭିଯାନରେ ସାମିଲ ହେବା ପାଇଁ ଆହ୍ବାନ ଦେଇଛନ୍ତି ।
ସେ କହିଛନ୍ତି କି ଯଦି ମୁଁ ହ୍ବିଲଚେୟାରରେ ବସି ସଫେଇ କରିପାରୁଛି, ତେବେ ଆପଣ କାହିଁକି ନୁହେଁ ? ଇନଶାହଙ୍କ ଏହି ଉଦ୍ୟମ ସତରେ ପ୍ରଶଂସନୀୟ । ଏହା ଅନେକଙ୍କୁ ‘ପ୍ଲଗିଙ୍ଗ ରନ୍’ ପାଇଁ ଆକର୍ଷିତ କରିବା ସହ ଅଭିଯାନରେ ସାମିଲ କରିବ ଏଥିରେ ଦ୍ବିମତ ନାହିଁ । ଖୋଦ କ୍ରୀଡାମନ୍ତ୍ରୀ କିରଣ ରିଜ୍ଜୁ ଏହାକୁ ଟ୍ବିଟ କରି ସମସ୍ତଙ୍କ ପାଇଁ ଏକ ଉଦାହରଣ ବୋଲି ଦର୍ଶାଇଛନ୍ତି ।
